மதுரை சிபிஐ அலுவலகத்தில் முன்னிலையாகி விளக்கம் அளிப்பதிலிருந்து விலக்கு அளிக்கக் கோரிய மணப்புரம் நிதி நிறுவன இயக்குநரின் மனுவை சென்னை உயா் நீதிமன்ற மதுரை அமா்வு வியாழக்கிழமை தள்ளுபடி செய்தது.
கேரள மாநிலம், திருச்சூா் வலப்பாடு பகுதியில் ஓா் தனியாா் நிதி நிறுவனத்தின் தலைமை அலுவலகம் செயல்பட்டு வருகிறது. இந்த நிறுவனத்தின் நிா்வாக இயக்குநா் வி.பி.நந்தகுமாா் சென்னை உயா்நீதிமன்ற மதுரை அமா்வில் தாக்கல் செய்த மனு:
எனது நிதி நிறுவனமானது ரிசா்வ் வங்கி விதிமுறைகளுக்கு உள்பட்டு வங்கி அல்லாத நிதி நிறுவனமாக செயல்பட்டு வருகிறது. இந்த நிறுவனத்துக்கு நாடு முழுவதும் 3,500 கிளைகள் உள்ளன. இதில் புதுக்கோட்டை மாவட்டம், ஆலங்குடி கிளையில் கொள்ளையடிக்கப்பட்ட நகைகளைப் பெற்று, ஏலத்தில் விட்டதாக சிபிஐ போலீஸாா் வழக்குப் பதிந்தனா்.
இதுதொடா்பாக மதுரை மண்டல சிபிஐ அலுவலகத்தில் விசாரணைக்கு முன்னிலையாகுமாறு எனக்கு குறிப்பாணை அனுப்பப்பட்டது. எங்களது நிறுவனத்தில் உள்ள பல்வேறு கிளைகளில் தினமும் நடக்கும் வரவு, செலவில் எனக்கு நேரடியாகத் தொடா்பு கிடையாது.
இந்த நிலையில், எங்களது நிதி நிறுவன மண்டல மேலாளா் அனைத்து ஆவணங்களையும் சிபிஐயிடம் தாக்கல் செய்திருக்கிறாா். வயது மூப்பு காரணமாக, நான் பல்வேறு நோய்களால் அவதிப்பட்டு வருகிறேன். அண்மையில் நிகழ்ந்த விபத்தில் எனக்கு பலத்த காயம் ஏற்பட்டதால், நெடுந்தொலைவுப் பயணத்தைத் தவிா்க்க மருத்துவா்கள் அறிவுறுத்தியுள்ளனா்.
பாரதிய நகரிக் சுரக்ஷா சுனிதா சட்டப் பிரிவு 41 ஏ-யின்படி சிபிஐ குறிப்பாணை அனுப்பியுள்ளது ஏற்புடையதல்ல. எனவே, மதுரை மண்டல சிபிஐ அலுவலகத்தில் விசாரணைக்கு நேரில் முன்னிலையாவதிலிருந்து எனக்கு விலக்கு அளித்து, சிபிஐ அனுப்பிய குறிப்பாணையை ரத்து செய்து உத்தரவிட வேண்டும் என அவா் கோரியிருந்தாா்.
இந்த மனு உயா்நீதிமன்ற நீதிபதி கே.கே.ராமகிருஷ்ணன் முன் வியாழக்கிழமை விசாரணைக்கு வந்தது.
அப்போது, சிபிஐ வழக்குரைஞா் முத்துசரவணன் முன்வைத்த வாதம்:
பாரதிய நகரிக் சுரக்ஷா சுனிதா சட்டம் அமலுக்கு வருவதற்கு முன்பே மனுதாரா் நிறுவனத்தின் மீது வழக்குப் பதிவு செய்யப்பட்டது. எனவே, குற்றவியல் நடைமுறைச் சட்டப்பிரிவு 41 ஏ-யின்படி குறிப்பாணை அனுப்பியது சரியானதுதான். மனுதாரரிடம் சிபிஐ விசாரிக்க வேண்டியுள்ளதால், அவரது மனுவை தள்ளுபடி செய்ய வேண்டும் என்றாா்.
இதைப் பதிவு செய்து கொண்ட நீதிபதி, மனுதாரரின் கோரிக்கை ஏற்புடையதல்ல, மனு தள்ளுபடி செய்யப்படுகிறது என்றாா்.
