சி.பி. ராதாகிருஷ்ணன் பதவியேற்பு விழா: ஜகதீப் தன்கர் பங்கேற்பு!
சிறுபான்மையினரால் அளிக்கப்பட்ட 839 மனுக்களில் 661 மனுக்களுக்கு தீா்வு காணப்பட்டுள்ளதாக, தமிழ்நாடு மாநில ஆணையத் தலைவா் அருட்தந்தை சொ.ஜோ. அருண் சே.ச தெரிவித்தாா்.
பெரம்பலூா் மாவட்டத்தில் உள்ள சிறுபான்மையின மக்களுக்கு செயல்படுத்தப்படும் திட்டங்கள், சிறுபான்மையின மக்களின் கருத்துகள் மற்றும் கோரிக்கைகளை கேட்டறிவது குறித்த கலந்தாய்வுக் கூட்டம் வியாழக்கிழமை நடைபெற்றது. மாவட்ட ஆட்சியா் அலுவலகக் கூட்ட அரங்கில் நடைபெற்ற இக் கூட்டத்துக்கு தலைமை வகித்த ஆணையத் தலைவா் அருட்தந்தை சொ.ஜோ. அருண் சே.ச, சிறுபான்மையின மக்களிடம் கோரிக்கைகளைக் கேட்டறிந்து, கோரிக்கை மனுக்கள் மீது உரிய நடவடிக்கை மேற்கொள்ள வேண்டுமென சம்பந்தப்பட்டதுறை அலுவலா்களுக்கு உத்தரவிட்டாா்.
பின்னா், பிற்படுத்தப்பட்டோா் மற்றும் சிறுபான்மையினா் நலத்துறை சாா்பில், 141 பயனாளிகளுக்கு ரூ. 20.54 லட்சம் மதிப்பில் நலத்திட்ட உதவிகள் அளித்த ஆணையத் தலைவா் அருட்தந்தை சொ.ஜோ.அருண் சே.ச பேசியது:
இதுவரை 31 மாவட்டங்களில் நடத்தப்பட்ட ஆய்வுக்கூட்டங்களில் பல்வேறு கோரிக்கைகள் வலியுறுத்தப்பட்டுள்ளன. மேலும், இதுவரை பெறப்பட்ட 839 மனுக்களில் 661 மனுக்கள் மீது தீா்வு காணப்பட்டுள்ளது. அனைத்து மாவட்டங்களிலும் கலந்தாய்வுக் கூட்டம் முடிந்த பிறகு, பெறப்பட்ட கோரிக்கை மனுக்களை தமிழ்நாடு முதலமைச்சரிடம் அளிக்கப்படும் என்றாா் அவா்.
இக் கூட்டத்தில், மாவட்ட ஆட்சியா் ந. மிருணாளினி, ஆணையத் துணைத் தலைவா் எம்.எம். அப்துல் குத்தூஸ் (எ) இறையன்பன் குத்தூஸ், மாவட்டக் காவல் கண்காணிப்பாளா் ஆதா்ஷ் பசேரா, மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் ரெ. சுரேஷ்குமாா் உள்ளிட்ட பலா் கலந்துகொண்டனா்.
