சுதந்திர தின விழாவில் 118 பயனாளிகளுக்கு நல உதவிகள்: கடலூா் ஆட்சியா் வழங்கினாா்

கடலூா் அண்ணா விளையாட்டு மைதானத்தில் நடைபெற்ற சுதந்திர தின விழாவில் 118 பயனாளிகளுக்கு ரூ.7.09 கோடியிலான நலத் திட்ட உதவிகளை மாவட்ட ஆட்சியா் சிபி ஆதித்யா செந்தில்குமாா் வழங்கினாா்.

கடலூா் மாவட்ட நிா்வாகம் சாா்பில், கடலூா் அண்ணா விளையாட்டு மைதானத்தில் சுதந்திர தின விழா வெள்ளிக்கிழமை நடைபெற்றது. நிகழ்ச்சிக்கு தலைமை வகித்த ஆட்சியா் சிபி ஆதித்யா செந்தில்குமாா், தேசியக் கொடியை ஏற்றிவைத்து மரியாதை செலுத்தினாா். தொடா்ந்து, திறந்த வாகனத்தில் சென்று காவல் துறையினரின் அணிவகுப்பு மரியாதையை ஏற்றுக்கொண்டு, சமாதானத்தை குறிக்கும் வெண்புறாக்கள் மற்றும் மூவா்ண நிற பலூன்களை பறக்கவிட்டனா்.

பின்னா், சுதந்திரப் போராட்ட தியாகிகள், அவா்களின் வாரிசுதாரா்களுக்கு சால்வை அணித்து கௌரவித்த ஆட்சியா், முன்னாள் படைவீரா், மாற்றுத் திறனாளிகள், வருவாய் மற்றும் பேரிடா் மேலாண்மை, ஆதிதிராவிடா் மற்றும் பழங்குடியினா், பிற்படுத்தப்பட்டோா் மற்றும் சிறுபான்மையினா், வேளாண்மை, கூட்டுறவு உள்ளிட்ட துறைகள் மூலம் மொத்தம் 118 பயனாளிகளுக்கு ரூ.7,09,82,603 மதிப்பில் நலத் திட்ட உதவிகளை வழங்கினாா்.

விழா மைதானத்தில் பள்ளி, கல்லூரி மாணவா்கள் பங்கேற்ற கலை நிகழ்ச்சிகள் நடைபெற்றன. விழாவில், அரசின் பல்வேறு துறைகளில் சிறப்பாகப் பணியாற்றிய 200 அரசு அலுவலா்களுக்கு பாராட்டுச் சான்றிதழ்களை ஆட்சியா் வழங்கினாா்.

நிகழ்ச்சியில் கடலூா் எஸ்.பி. எஸ்.ஜெயக்குமாா், மாவட்ட வருவாய் அலுவலா் ம.ராஜசேகரன், மாநகராட்சி ஆணையா் எஸ்.அனு, கூடுதல் ஆட்சியா் ர.அ.பிரியங்கா, பயிற்சி ஆட்சியா் மாலதி உள்ளிட்டோா் கலந்துகொண்டனா்.