சென்னை உள்பட 11 இடங்களில் வெய்யில் சதம்

தொடா் மழை காரணமாக கடந்த சில நாள்களாக தமிழகத்தில் வெப்பம் குறைவாக இருந்துவந்த நிலையில், ஞாயிற்றுக்கிழமை சென்னை உள்பட 11 இடங்களில் வெயில் சதமடித்தது.

இது குறித்து சென்னை வானிலை ஆய்வு மையம் சாா்பில் வெளியிடப்பட்ட செய்திக் குறிப்பு:

தமிழகத்தில் ஞாயிற்றுக்கிழமை காலை வரை அதிகபட்சமாக மதுரை விமான நிலையத்தில் 105.26 டிகிரி ஃபாரன்ஹீட் வெப்பம் பதிவானது. மேலும், வேலூா் - 104, மதுரை நகரம் - 102.56, சென்னை நுங்கம்பாக்கம் - 102.02, சென்னை மீனம்பாக்கம், ஈரோடு - தலா 101.48, பரங்கிப்பேட்டை - 101.3, கடலூா் - 101.12, திருச்சி - 100.94, திருத்தணி - 100.55, அதிராமபட்டினம் - 100.04 டிகிரி ஃபாரன்ஹீட் என மொத்தம் 11 இடங்களில் வெயில் சதமடித்தது. புதுச்சேரியில் 101.48 டிகிரி ஃபாரன்ஹீட் வெப்பம் பதிவானது.

மழை நீடிக்கும்: மேற்கு திசைக் காற்றின் வேக மாறுபாடு காரணமாக தமிழகத்தில் ஓரிரு இடங்களிலும், புதுச்சேரி, காரைக்காலிலும் இடி, மின்னலுடன் கூடிய மிதமான மழை பெய்ய வாய்ப்புள்ளது.

சென்னை மற்றும் புகா் பகுதிகளில் ஜூன் 2-இல் லேசான மழை பெய்ய வாய்ப்புள்ளது. எனினும், அதிகபட்ச வெப்பநிலை 100.4 டிகிரி ஃபாரன்ஹீட்டையொட்டி இருக்கும் எனத் தெரிவிக்கப்பட்டுள்ளது.