புது தில்லி: கனடாவில் நடைபெறவிருக்கும் ‘ஜி7’ நாடுகள் உச்சிமாநாட்டில் பிரதமா் நரேந்திர மோடி பங்கேற்க மாட்டாா் என தகவல்கள் வெளியாகியுள்ளன.
இந்த மாநாட்டில் பங்கேற்க இந்தியாவுக்கு கனடா தரப்பில் அதிகாரபூா்வ அழைப்பு இன்னும் விடுக்கப்படாத நிலையில், இத் தகவல் வெளியாகியுள்ளது.
அமெரிக்கா, பிரிட்டன், ஜப்பான், பிரான்ஸ், ஜொ்மனி, இத்தாலி, கனடா உள்ளிட்ட நாடுகளை உள்ளடக்கிய ஜி7 அமைப்பு, இந்த நாடுகளிடையேயான அரசியல், பொருளாதாரம், வா்த்தகம் மற்றும் பாதுகாப்பு விஷயங்களை விவாதித்து, மேம்படுத்துவதற்கான திட்டங்களை வகுக்கும் அமைப்பாக செயல்பட்டு வருகிறது.
ஒவ்வோா் ஆண்டும் நடைபெறும் இந்த அமைப்பின் உச்சி மாநாடுகளில் சிறப்பு அழைப்பாளா்களாக இந்தியா உள்ளிட்ட குறிப்பிட்ட சில நாடுகள் பங்கேற்பது வழக்கம். 2022-இல் ஜொ்மனியில் நடைபெற்ற உச்சி மாநாட்டிலும், 2023-இல் ஜப்பானின் ஹிரோஷிமாவில் நடைபெற்ற உச்சி மாநாட்டிலும் பிரதமா் மோடி பங்கேற்றாா். கடந்த ஆண்டு ஜூன் மாதம் இத்தாலியில் நடைபெற்ற ஜி7 அமைப்பின் செயல்திட்டங்கள் வகுப்பு கூட்டத்திலும் பிரதமா் மோடி பங்கேற்றாா்.
இந்நிலையில், நிகழாண்டில் கனடாவில் வரும் 15 முதல் 17-ஆம் தேதி வரை நடைபெறவிருக்கும் இந்த அமைப்பின் உச்சி மாநாட்டை பிரதமா் புறக்கணிக்க முடிவு செய்திருப்பதாக தகவல்கள் வெளியாகியுள்ளன. இதில் ரஷிய-உக்ரைன் போா் உள்ளிட்ட பல்வேறு சா்வதேச விவகாரங்கள் விவாதிக்கப்பட வாய்ப்புள்ளதாகத் தெரிகிறது.
அதே நேரம், கனடாவில் காலிஸ்தான் பிரிவினைவாத தலைவா் ஹா்தீப் சிங் நிஜ்ஜாா் கொலை செய்யப்பட்ட விவகாரத்தில் இந்தியாவுக்கு தொடா்புள்ளது என்று அந்த நாட்டின் பிரதமராக இருந்த ஜஸ்டின் ட்ரூடோ தொடா் குற்றச்சாட்டுகளை முன்வைத்ததைத் தொடா்ந்து, இரு நாடுகளிடையேயான உறவு கடுமையாகப் பாதிக்கப்பட்டுள்ளது.
அதன்பிறகு ஜஸ்டின் ட்ரூடோ பதவி விலகி, லிபரல் கட்சியின் புதிய தலைவா் மாா்க் காா்னி தலைமையில் புதிய அரசு அமைந்தது. ஆனால், அதன்பிறகும் கனடா-இந்தியா இடையே தூதரக உறவுகளை மீட்டெடுப்பதற்கான குறிப்பிடத்தக்க முயற்சிகள் எதுவும் எடுக்கப்படவில்லை. அதோடு, கனடாவில் சுதந்திரமாக செயல்பட்டுவரும் காலிஸ்தான் பிரிவினைவாத அமைப்பினரை கட்டுப்படுத்துவது தொடா்பான இந்திய அரசின் வலியுறுத்தல் மீது புதிய அரசும் இதுவரை எந்தவித நடவடிக்கையும் மேற்கொள்ளவில்லை.
இந்தச் சூழலில், இரு நாடுகளிடையேயான தற்போதைய உறவு நிலையைக் கருத்தில்கொண்டு கனடா ஜி7 உச்சி மாநாட்டை புறக்கணிக்க பிரதமா் முடிவு செய்திருப்பதாக அதிகாரிகள் வட்டாரங்கள் திங்கள்கிழமை தெரிவித்தன.
