தமிழகத்தில் சட்டம்-ஒழுங்கு சீா்குலைந்துவிட்டது: ஜி.கே.வாசன்

தமிழகத்தில் சட்டம் -ஒழுங்கு சீா்குலைந்து விட்டது என்று தமாகா தலைவா் ஜி.கே.வாசன் தெரிவித்தாா்.

ஈரோடு மாவட்டம், சிவகிரி அருகே மேகரையான்தோட்டத்தில் தனியாக வசித்த வயதான தம்பதியை மா்ம நபா்கள் சில வாரங்களுக்கு முன் கொலை செய்து நகை, பணத்தை திருடிச்சென்றனா். அக்குடும்பத்தினரை நேரில் சந்தித்து தமாகா தலைவா் ஜி.கே.வாசன் வியாழக்கிழமை ஆறுதல் கூறினாா்.

பின்னா் பாகிஸ்தானுடனான மோதலில் மிகச்சிறப்பாக செயல்பட்ட இந்திய வீரா்களுக்கு ஈரோடு திண்டல் வேளாளா் கல்லூரி அருகே மரியாதை செலுத்திய வாசன் நிருபா்களிடம் கூறியதாவது: பஹல்காமில் பயங்கரவாதிகள் நடத்திய தாக்குதலுக்கு பதிலடி அளிக்கும் வகையில் இந்திய ராணுவம் வெற்றியை நிலைநாட்டியுள்ளது. பொள்ளாச்சி பாலியல் சம்பவ தீா்ப்பு தொடா்பாக ஆளும் திமுக அரசியல் ஆதாயம் தேட நினைக்க வேண்டாம்.

தமிழகத்தில் சட்டம் -ஒழுங்கு சீா்குலைந்து கொலை, கொள்ளை, திருட்டு, நகைப் பறிப்பு தொடா்கதையாகி வருகிறது. கிராமங்களில் தனியாக வீடுகளில் உள்ள வயதானவா்களைக் குறிவைத்து கொலை செய்து கொள்ளையடிப்பது வழக்கமாகி உள்ளது.

நெல்லை அருகே காங்கிரஸ் மாவட்டத் தலைவா் கொலை, திருப்பூா், சென்னிமலை, சிவகிரி சம்பவங்களில் குற்றவாளி குறித்து கண்டறியவில்லை. தமிழக காவல் துறையால் கண்டுபிடிக்க முடியாது என்றால் சிபிஐயிடம் ஒப்படைக்கலாம்.

தமிழகத்தில் அதிமுக, பாஜக, தமாகா கூட்டணியுடன் மேலும் பல கட்சிகள் இணையும். ஈரோட்டில் சாய, சலவை ஆலை கழிவால் புற்றுநோய் ஏற்படுகிறது. இங்கு புற்றுநோய் ஆராய்ச்சி மையம் அமைக்க கோரி தமாகா தொடா்ந்து போராடுகிறது. காவிரி, பவானி உள்ளிட்ட ஆறுகளில் ஆலைக் கழிவு கலப்பதை தடுக்க வேண்டும்.

வஉசி சந்தை, காளை மாடு சிலை அருகே கட்டிமுடிக்கப்பட்ட வணிக வளாகம், கருங்கல்பாளையம், அக்ரஹாரம், அன்னை சத்யா நகா், சித்தோடு ஐஆா்டிடி அருகே கட்டிய அடுக்கு மாடிக் குடியிருப்புக்களை உடனடியாக பயனாளிகளுக்கு வழங்க வேண்டும்.

அத்திக்கடவு-அவிநாசி திட்டத்தில் விடுபட்ட குளம், ஏரிகளை சோ்த்து செயல்படுத்த வேண்டும். பெருந்துறை சிப்காட் மாசுக் கழிவை எதிா்த்து போராடிய, விவசாயிகள், பொதுமக்கள் மீது போடப்பட்ட வழக்கை திரும்ப பெற வேண்டும் என்றாா்.

தமாகா மாநில துணைத் தலைவா் விடியல் சேகா், மாநில பொதுச் செயலாளா் யுவராஜா, மாநில செயற்குழு உறுப்பினா் சந்திரசேகா், மொடக்குறிச்சி வட்டாரத் தலைவா் பேட்டை சுரேஷ், மாநகா் மாவட்டத் தலைவா் விஜயகுமாா், மூத்த தலைவா் ஆறுமுகம் உள்ளிட்ட பலா் உடனிருந்தனா்.