தமிழகத்தில் முதன்முறையாக AI தொழில்நுட்பத்தில் ATM மூலம் நகைக் கடன்.. பரமக்குடியில் அறிமுகம்!

சென்ட்ரல் பேங் ஆப் இந்தியா வங்கி நாடு முழுவதும் பல்வேறு கிளைகளை கொண்டுள்ளது. இந்த வங்கியின் சார்பில் வாடிக்கையாளர்கள் நகைக் கடன்களை எளிதாக பெறும் வகையில் ஏ.டி.எம் இயந்திரம் மூலம் நகைகடன் முறையினை அறிமுகப்படுத்தியுள்ளது.

இந்தியாவில் முதன் முறையாக தெலுங்கானா மாநிலம் வாரங்கல் கிளையில் கடந்த 6 மாதங்களுக்கு முன் துவங்கப்பட்டது.

இதன் அடுத்த கட்டமாக பரமக்குடியில் உள்ள சென்ட்ரல் பேங் ஆப் இந்தியா வங்கி கிளையில் இந்த வசதி ஏற்படுத்தப்பட்டுள்ளது. செயற்கை நுண்ணறிவு எனப்படும் ஏ.ஐ தொழில் நுட்பத்துடன் தமிழகத்தில் முதன் முறையாக இத்திட்டம் துவக்கப்பட்டுள்ளது. இதனை வங்கியின் நிர்வாக இயக்குனர் மற்றும் செயல் அலுவலர் மாதம் வெங்கடராவ் திறந்து வைத்தார்.

இந்த நவீன திட்டத்தின் வாயிலாக நகைக் கடன் பெற விரும்பும் வாடிக்கையாளரின் செல் நம்பர் மற்றும் ஆதார் நம்பர் ஆகியவற்றை செலுத்திய பிறகு தங்க நகையினை இயந்திரத்தின் ஒரு பகுதியில் வைத்தவுடன் அந்த நகைக்கான மதிப்பு தெரிவிக்கப்படும். அதனை தொடர்ந்து வாடிக்கையாளர் தங்க நகைக்கு பதிலாக கடன் தொகையினை எடுத்துக்கொள்ளவோ அல்லது தங்கள் வங்கி கணக்கில் வரவு வைக்கவோ செய்யலாம்.

இந்த நவீன நகைக் கடன் ஏ.டி.எம் வசதியில் நகை கடன் பெற விரும்பும் வங்கி வாடிக்கையாளர்கள் பல மணி நேரம் காத்திருக்கும் நிலை தவிர்க்கப்படுவதுடன் எளிதாக நகை கடன் தொகையினை பெற்றுச்செல்ல முடியும் எனவும் அடகு வைக்கப்படும் நகைகளின் தங்கதின் தன்மையும் உறுதிபடுத்தப்படும் என வங்கி நிர்வாக இயக்குநர் மாதம் வெங்கடராவ் தெரிவித்தார்.