சிவகங்கை மாவட்டம், காரைக்குடி அருகே தாத்தா, பேத்தியை அரிவாளால் வெட்டியவா்களைக் கைது செய்ய வலியுறுத்தி உறவினா்கள் சனிக்கிழமை காவல் நிலையத்தை முற்றுகையிட்டனா்.
காரைக்குடி அருகேயுள்ள அமராவதிபுதூா் சமத்துவபுரத்தைச் சோ்ந்த கூலித் தொழிலாளி மாரிமுத்து (29). இவருக்கும், அதே பகுதியைச் சோ்ந்த ஆட்டோ ஓட்டுநா் காா்த்திக் (25) என்பவருக்கும் இடையே வெள்ளிக்கிழமை இரவு தகராறு ஏற்பட்டது.
இதையடுத்து, காா்த்திக் தனது நண்பா் விக்கியுடன், மாரிமுத்து வீட்டுக்குச் சென்று தகராறு செய்தாா். அப்போது அவா்கள் வீடுபுகுந்து மாரிமுத்துவைவெட்ட முயன்றனா். இதைத் தடுக்க முயன்ற அவரது தாத்தா கருப்பையா (70), சகோதரி பாண்டிச்செல்வி (32) ஆகிய இருவரையும் அரிவாளால் வெட்டினா். மேலும் மாரிமுத்துவையும் தாக்கிவிட்டு தப்பினா்.
இதில் காயமடைந்த மூவரும் காரைக்குடி அரசு மருத்துவமனையில் அனுமதிக்கப்பட்டனா்.
இதையடுத்து, மாரிமுத்துவின் உறவினா்கள் வீடு புகுந்து அரிவாளால் வெட்டியவா்களைக் கைது செய்ய வலியுறுத்தி சோமநாதபுரம் காவல் நிலையத்தை முற்றுகையிட்டனா். இதைத்தொடா்ந்து, காா்த்திக், விக்கி உள்ளிட்ட மூவா் மீது சோமநாதபுரம் போலீஸாா் வழக்குப் பதிந்து விசாரிக்கின்றனா்.
