திமுக ஆட்சியை அகற்ற எதிா்க்கட்சிகள் அனைத்தும் ஓரணியில் திரள வேண்டும்! - நயினாா் நாகேந்திரன்

தமிழகத்தில் திமுக ஆட்சியை அகற்ற எதிா்க்கட்சிகள் அனைத்தும் ஓரணியில் திரள வேண்டும் என்று பாஜக மாநிலத் தலைவா் நயினாா் நாகேந்திரன் அழைப்பு விடுத்தாா்.

மதுரையில் பாஜக நிா்வாகிகள் ஆலோசனைக் கூட்டம் வெள்ளிக்கிழமை நடைபெற்றது. இதில் பங்கேற்ற தமிழக பாஜக தலைவா் நயினாா் நாகேந்திரன் செய்தியாளா்களிடம் கூறியதாவது:

மக்களுக்கு எதிரான திமுக ஆட்சியை அகற்ற எதிா்க்கட்சிகள் அனைத்தும் ஓரணியில் திரள வேண்டும். இதுவே பாஜகவின் விருப்பம். வருகிற சட்டப்பேரவைத் தோ்தலில் யாா் வெற்றி பெறுவது என்பதைத் தீா்மானிப்பது மக்கள் சக்தி மட்டுமே. தமிழகத்தில் தமிழ், ஆங்கிலத்தைத் தவிா்த்து மூன்றாவதாக ஒரு மொழி இருக்க வேண்டும். அது மலையாளம் அல்லது கன்னடமாகக்கூட இருக்கலாம். கூடுதலாக ஒரு மொழியைக் கற்றுக் கொள்வது அனைவருக்கும் நல்லது.

மத்திய உள்துறை அமைச்சா் அமித் ஷா சென்னைக்கு வந்த போது, முன்னாள் முதல்வா் ஓ. பன்னீா்செல்வத்தை சந்திக்க முடியாத சூழல் ஏற்பட்டது. எடப்பாடி கே.பழனிசாமி, ஓ.பன்னீா்செல்வம் இருவரும் பாஜக கூட்டணியில்தான் உள்ளனா். கட்சி தொடங்கும் அனைவரும் தோ்தலில் வெற்றி பெற வேண்டும் என்பதற்காகத்தான் தொடங்குகின்றனா். ஆனால், இந்த வெற்றியைத் தீா்மானிப்பது மக்கள்தான்.

அரசியலைப்புச் சட்டத்தில் மாநில ஆளுநருக்கு என சில அதிகாரங்கள் உள்ளன. சட்டப்பிரிவு 200-ஐ ஆளுநா்தான் பயன்படுத்த முடியும். 201-ஆவது சட்டப் பிரிவை குடியரசுத் தலைவா்தான் பயன்படுத்த முடியும். நீதிமன்றத்துக்கும் சில வரையறைகள் உள்ளன. தமிழகத்தில் பாஜக வளா்ந்துள்ளது. வருகிற சட்டப்பேரவைத் தோ்தலில் வெற்றி பெறுவதே எங்களது முதல் இலக்கு என்றாா் அவா்.