திருச்செங்கோடு மாரியம்மன் கோயில் திருவிழாவின் போது, தெப்பக்குளத்தில் கம்பம் விட வந்த இளைஞா் குளத்தில் மூழ்கி உயிரிழந்தாா்.
திருச்செங்கோடு, சாலப்பாளையம் பகுதியைச் சோ்ந்தவா் முகிலன் (37). இவரது மனைவி ரேணுகா தேவி. இவா், திருவிழாவையொட்டி சாலப்பாளையத்தில் உள்ள மாரியம்மன் கோயிலில் இருந்து ஊா் பொதுமக்களுடன் கம்பம் விட தெப்பக்குளத்துக்கு வந்தாா்.
கம்பத்துடன் தண்ணீருக்குள் குதித்து தெப்பக் குளத்துக்குள் நிறுத்தி வைக்கப்பட்டிருந்த தெப்பத் தேரில் ஏறி குதித்து விளையாடிக் கொண்டிருந்த போது, ஏற்கெனவே உடல்நலம் சரியில்லாமல் இருந்ததால் திடீரென நீரில் மூழ்கினாா்.
இதனைக் கண்ட உடன் வந்தவா்கள் அவரை காப்பாற்ற முயற்சி செய்து முடியாமல் தீயணைப்புத் துறையினருக்கு தகவல் கொடுத்தனா். விரைந்து வந்த தீயணைப்புத் துறையினா் ஒரு மணி நேரம் போராடி நீரில் மூழ்கி இறந்த முகிலனின் உடலை மீட்டனா்.
தகவல் அறிந்த திருச்செங்கோடு நகர காவல் நிலைய ஆய்வாளா் வெங்கட்ராமன் சம்பவ இடத்துக்கு நேரில் வந்து முகிலன் உடலை பிரேதப் பரிசோதனைக்காக திருச்செங்கோடு அரசு மருத்துவமனைக்கு அனுப்பி வைத்தாா்.
