திருவண்ணாமலை நிலச்சரிவு: `இன்னும் ரெண்டு பேரை மீட்கல’ - போராட்டத்தில் கதறி அழுத உறவினர்கள்!

திருவண்ணாமலை, தீப மலையில் ஏற்பட்ட நிலச்சரிவு தமிழ்நாட்டையே உலுக்கியிருக்கிறது.

அடிவாரத்தில் இருந்து சுமார் 100 அடி உயரமுள்ள மலை முகட்டில் இருந்த ஒரு வீடே மண்ணுக்குள் புதைந்து காணாமல் போயிருக்கிறது. தகர ஷீட்டால் வேயப்பட்ட அந்த சிறிய வீட்டுக்குள் தங்கியிருந்த 5 சிறார்கள் உட்பட 7 பேருமே மண்ணுக்குள் உயிரோடு புதைந்துபோயிருக்கிறார்கள். மண் சரிவில் ராட்சத பாறைகளும் இழுத்து வரப்பட்டு வீட்டின் மீது குவியலாக விழுந்ததால், அந்த வீடு சுக்கு நூறாக உடைந்து போயிருக்கிறது. வீட்டுக்குள் இருந்த அனைவருமே உடல் நசுங்கி இறந்திருக்கின்றனர். புதைந்துபோன வீட்டில் இருந்து 500 மீட்டர் தூரம் வரை மண் சரிவின் தாக்கம் இருந்திருக்கிறது. கிரிவலப் பாதையையொட்டிய வ.உ.சி நகரின் முகப்பில் இருந்த இருசக்கர வாகனங்களும்கூட புதைக்குழியில் சிக்கியதைபோல் காணப்பட்டன.

டிசம்பர் 1-ம் தேதி மாலை 5 மணியளவில், இந்த கோரச் சம்பவம் நடந்தேறியது. ஆனால், அன்று பெய்த கனமழைக் காரணமாக மீட்புப் பணியை மேற்கொள்வதில் பல்வேறு சிக்கல்கள் ஏற்பட்டன. இதையடுத்து, தேசிய பேரிடர் மீட்புப் படையினர் வரவழைக்கப்பட்டு 2-ம் தேதியான நேற்று காலையில்தான் மீட்புப் பணி தொடங்கப்பட்டது. ஆனாலும், ஹிட்டாச்சி வாகனம் வரவழைக்கப்பட்டு ஒவ்வொரு பக்கெட்டாக மண் அள்ளப்பட்டு, பாறைகள் அகற்றப்பட்ட பிறகே உடல்கள் தென்பட்டன. சரியாக, நேற்று மாலை 5.49 மணிக்குத்தான் முதல் உடல் கிடைத்தது.

ஹிட்டாச்சி வாகனத்தின் பக்கெட் கொக்கியில் தொங்கியபடி 9 வயது சிறுவன் கௌதமின் உடல் மேலே வந்ததை பார்த்தபோது, நெஞ்சம் பதறிப் போனது. இதையடுத்து, 14 வயது சிறுமி வினோதினி, 12 வயது சிறுமி மகா, 7 வயது சிறுமி இனியா மற்றும் இனியாவின் தாயான 26 வயது பெண் மீனா ஆகிய நால்வரின் உடல்களும் அடுத்தடுத்து இடிபாடுகளில் இருந்து சிரமப்பட்டு மீட்கப்பட்டன.

ஈரமண்ணுக்குள் புதைந்துபோனதால் கை, கால்கள் பிய்த்துகொண்டதையும் பார்க்க முடிந்தது. உடல் பாகங்கள் சிதைவதை தடுக்க தேசிய பேரிடர் மீட்புப் படையினர் குழிக்குள் இறங்கி, தார்ப்பாய் மூலமாக உடல்களை சுருட்டி மேலே கொண்டு வந்தனர். 5 பேரின் உடல்கள் கிடைத்த நிலையில், வீட்டின் உரிமையாளரான ராஜ்குமார் மற்றும் அவரின் உறவினர் மகளான 12 வயது சிறுமி ரம்யா ஆகிய மேலும் இருவரை தேடும் பணியும் நேற்று இரவு 10 மணி வரை தொடர்ந்தது. துணை முதலமைச்சர் உதயநிதி ஸ்டாலினும் நேரில் வந்து சம்பவ இடத்தை பார்வையிட்டுச் சென்றார்.

இதைத் தொடர்ந்து, மீட்புப் பணி தற்காலிகமாக கைவிடப்பட்டு இன்று காலை 7 மணியளவில் மீட்புப் பணி தொடங்கப்பட்டிருக்கிறது. வீடு இருந்த இடத்தில் பெரிய ராட்சத பாறை கிடக்கிறது. அதை அகற்றினாலே மற்ற இருவரின் நிலையும் தெரியவரும் என்கின்றனர் மீட்புப் படையினர்.

இந்த நிலையில், `மீட்புப் பணியில் அலட்சியம் காட்டப்படுவதாக’ குற்றம்சாட்டி இறந்தவர்களின் உறவினர்கள் இன்று காலை போராட்டத்தில் ஈடுபட்டனர். போராட்டத்தில் ஈடுபட்டவர்கள் கூறும்போது, ``வீட்டோடு புதைஞ்சிப்போய் இன்னையோட மூணு நாள் ஆகுது. அஞ்சிப்பேர் உடல்களைத்தான் மீட்டிருக்கிறாங்க. இன்னும் ரெண்டுப் பேரை மீட்கல. சம்பவம் நடந்த அன்னைக்கு மழை வந்துச்சு. அதனால மீட்புப் பணியில உடனடியாக ஈடுபட முடியலனு சொன்னாங்க. ஆனா, நேத்தைக்கு மழை அவ்ளோ இல்ல. தூரல் மட்டும்தான் போட்டுக்கிட்டிருந்துச்சி. ஆனாலும், நேத்து சாயிங்காலத்துக்கு அப்புறமாத்தான் புதைஞ்சிப்போனவங்கள பொணமா மீட்டாங்க. எங்ககிட்ட ஏழுப் பேரையும் மீட்டுட்டதாக முதல்ல சொன்னாங்க. ஆனா, இன்னும் ரெண்டு பேர் நிலைமையே தெரியல. அதிகாரிங்க வராங்க. போறாங்க. எங்கக்கிட்ட எந்த தகவலையுமே சொல்ல மாட்டிக்கிறாங்க. உடனடியா, மத்த ரெண்டு பேரையும் மீட்கணும்’’ என்கின்றனர் கண்ணீர் விட்டு அழுதபடியே.