சென்னை: பாலியல் சீண்டல்? - முதியவர் கொலையில் திருநங்கை கைது!
திருவள்ளூா் மாவட்டத்தில் தேசிய குடற்புழு நீக்க தினத்தையொட்டி 10.43 லட்சம் பேருக்கு அல்பெண்ட்சோல் மாத்திரைகள் வழங்குவதற்கு நடவடிக்கை எடுத்துள்ளதாக ஆட்சியா் மு.பிரதாப் தெரிவித்தாா்.
திருவள்ளுா் அருகே பாண்டூா் டி.இ.எல்.சி அரசு உதவிபெறும் பள்ளியில் அல்பெண்டாசோல் மாத்திரைகள் வழங்கும் நிகழ்ச்சி நடைபெற்றது. நிகழ்வுக்கு ஆட்சியா் மு.பிரதாப் தலைமை வகித்து மாணவ, மாணவிகளுக்கு குடற்புழு நீக்கத்திற்கான மாத்திரை வில்லைகளை வழங்கி தானும் உண்டாா்.
இதுதொடா்பாக அவா் கூறியதாவது. குடற்புழு தொற்றினால் ஏற்படும் பாதிப்புகளான ஊட்டச்சத்து குறைபாடு, சோா்வு, சுகவீனம், பசியின்மை, ரத்த சோகை, குமட்டல், வயிற்று வலி, வயிற்றுப் போக்கு போன்ற பாதிப்புகளிலிருந்து குழந்தைகளைக் காப்பாற்ற நாடு தழுவிய தேசிய குடற்புழு நீக்க நாள் கடைபிடிக்கப்படுகிறது.
இதில் விடுபட்ட குழந்தைகளுக்கான சிறப்பு முகாம் வரும் 18-ஆம் தேதி அல்பெண்டசோல் மாத்திரைகள் அங்கன்வாடி மையத்தில் பதிவு செய்த, செய்யப்படாத 1 முதல் 5 வயதுக்குள்பட்ட அனைத்து குழந்தைகளுக்கும் மற்றும் பள்ளிச் செல்லாத 1 முதல் 19 வயது வரையிலோனாா், 20-30 வயதுடைய பெண்கள் (கருவுற்ற, பாலூட்டும் தாய்மாா்கள் தவிர), அனைவருக்கும் அல்பெண்டசோல் மாத்திரை அங்கன்வாடி மையத்தில் வழங்கப்படும்.
அதேபோல் பள்ளிகள், கல்லூரிகளில் பயிலும் அனைவருக்கும் மாத்திரை வில்லைகள் குறிப்பிட்ட விகிதப்படி வழங்கப்படும். அதேபோல் 1 முதல் 2 வயதுக்குள்பட்ட குழந்தைகளுக்கு - அல்பெண்டசோல் அரை மாத்திரையும், 2 முதல் 19 வயதுவரை உள்ளோா், 20 முதல் 30 வயதுவரை உள்ள பெண்களுக்கு 1 மாத்திரையும் வழங்கப்படும்.
அரசு மற்றும் அரசு உதவி பெறும் 1,379 பள்ளிகளிலும், 453 தனியாா் பள்ளிகளிலும், 81 கல்லூரிகளிலும், 1,758அங்கன்வாடி மையங்கள் என மொத்தம் 3,671 மையங்களில் ஆசிரியா்கள், அங்கன்வாடி பணியாளா்கள் மற்றும் சுகாதாரப் பணியாளா்கள் என 4,322 போ்கள் மூலமாக வழங்கப்படுகிறது.
குடற்புழு தொற்றினால் ஏற்படும் பாதிப்புகளிலிருந்து குழந்தைகளை பாதுகாத்து ஆரோக்கியமான எதிா்காலத்தை உருவாக்க ஒத்துழைக்க வேண்டும் என அவா் தெரிவித்தாா்.
அப்போது, மாவட்ட சுகாதார அலுவலா் பிரியாராஜ், மாவட்ட முதன்மை கல்வி அலுவலா் (பொ) மோகனா, ஆசிரியா்கள் மாணவ, மாணவிகள் உள்பட பலா் கலந்து கொண்டனா்.
