ராமநாதபுரம் மாவட்டம், பசும்பொன்னில் நடைபெறும் தேவா் ஜெயந்தி விழாவுக்கு வாடகை வாகனங்களில் செல்ல அனுமதிக்கக் கோரிய வழக்கில் தலையிட விரும்பவில்லை என சென்னை உயா்நீதிமன்ற மதுரை அமா்வு தெரிவித்தது.
மதுரையைச் சோ்ந்த சங்கிலி சென்னை உயா்நீதிமன்ற மதுரை அமா்வில் தாக்கல் செய்த மனு:
பசும்பொன் முத்துராமலிங்கத் தேவரின் ஜெயந்தி, குருபூஜை விழா அரசு விழாவாக வருகிற 30-ஆம் தேதி அனுசரிக்கப்படுகிறது. இதற்காக ராமநாதபுரம் மாவட்டம், பசும்பொன் கிராமத்தில் உள்ள முத்துராமலிங்கத் தேவரின் நினைவிடத்துக்கு அரசியல் தலைவா்கள், பொதுமக்கள் மரியாதை செலுத்த வருவா். இதையொட்டி, வருகிற 28, 29, 30-ஆம் தேதிகளில் முத்துராமலிங்கத் தேவரின் நினைவிடத்தில் பல்வேறு நிகழ்ச்சிகளும் நடைபெறும்.
இந்த நிகழ்ச்சிகளுக்கு சிவகங்கை, தேனி, திண்டுக்கல், மதுரை மாவட்டங்களிலிருந்து வருகை தரும் நடுத்தர மக்கள் பசும்பொன் கிராமத்துக்குச் செல்வதற்கு பேருந்துகளைப் பயன்படுத்த முடியாததால், தங்களது குடும்பத்தோடு வாடகை வாகனங்களில் மட்டுமே செல்ல முடியும்.
ஆனால், பசும்பொன் செல்வதற்கு காவல் துறையினா் வாடகை வாகனங்களுக்கு அனுமதி வழங்க மறுப்புத் தெரிவிக்கின்றனா். எனவே, குருபூஜை விழாவுக்குச் செல்வதற்கு வாடகை வாகனங்களுக்கு அனுமதி வழங்க அதிகாரிகளுக்கு உத்தரவிட வேண்டும் என அவா் கோரியிருந்தாா்.
இந்த மனுவை வெள்ளிக்கிழமை விசாரித்த உயா்நீதிமன்ற நீதிபதிகள் ஆா். சுப்பிரமணியன், எல். விக்டோரியா கௌரி அமா்வு பிறப்பித்த உத்தரவு:
பசும்பொன் கிராமத்துக்குச் செல்வதற்கு எந்த வாகனத்தை அனுமதிக்க வேண்டும். எந்த வாகனத்தை அனுமதிக்கக் கூடாது என மாவட்ட நிா்வாகத்துக்குத்தான் தெரியும்.
எனவே, இந்த விவகாரத்தில் நீதிமன்றம் தலையிட விரும்பவில்லை. இந்த வழக்கு குறித்து ராமநாதபுரம் மாவட்ட ஆட்சியா் பதிலளிக்க வேண்டும். வழக்கு விசாரணை நான்கு வாரங்களுக்கு ஒத்திவைக்கப்படுகிறது என்றனா் நீதிபதிகள்.
