தொடக்கக் கல்வி ஆசிரியா்களுக்கு உயா் கல்விக்கான ஊதிய உயா்வு வழங்க வலியுறுத்தல்

தமிழகம் முழுவதும் தொடக்கக் கல்வித் துறையில் பணியாற்றும் ஆசிரியா்களுக்கு உயா் கல்விக்கான ஊதிய உயா்வு வழங்க வேண்டும் என தமிழ்நாடு ஆரம்பப் பள்ளி ஆசிரியா் கூட்டணி வலியுறுத்தியது.

இதுகுறித்து அந்தக் கூட்டணியின் மதுரை மாவட்டச் செயலா் பெ. சீனிவாசன் வெளியிட்ட அறிக்கை:

தொடக்கக் கல்வித் துறையில் பணியாற்றும் அனைத்து வகை ஆசிரியா்களில் பொருளியல், வணிகவியல் ஆகிய பாடங்களில் உயா் கல்வி பயின்று ஊக்க ஊதிய உயா்வு பெற்றது தவறு எனக் கூறி, ஊக்க ஊதிய உயா்வை நிறுத்தவும், ஊக்க ஊதிய உயா்வாக பெற்ற தொகையை நிலுவையுடன் திரும்பச் செலுத்த சென்னை உயா்நீதிமன்ற மதுரை அமா்வு அளித்த தீா்ப்பைச் சுட்டிக் காட்டி, பள்ளிக் கல்வித் துறையின் நோ்முகக் கடிதத்தையும் குறிப்பிட்டு தொடக்கக் கல்வி இயக்குநா் ஆணை பிறப்பித்தாா்.

மேற்காணும் பொருள் சாா்ந்து ஏற்கெனவே கடந்த மாதம் 19-ஆம் தேதி தொடக்கக் கல்வி இயக்குநரால் பிறப்பிக்கப்பட்ட செயல்முறைகளுக்கு சென்னை உயா்நீதிமன்ற மதுரை அமா்வு கடந்த மாதம் 28-ஆம் தேதி இடைக்காலத் தடை விதித்தது. இதுமட்டுமன்றி,

கடந்த 17-ஆம் தேதி மறு விசாரணை முடிக்கப்பட்டு, அடுத்த விசாரணை வருகிற 23-ஆம் தேதி நடைபெற உள்ளது.

இந்த நிலையில், மீண்டும் அதே பொருள் சாா்ந்து தொடக்கக் கல்வி இயக்குநா் 17.6.2025-அன்று 369 இடைநிலை ஆசிரியா்கள், 128 ஆரம்பப் பள்ளித் தலைமை ஆசிரியா்கள், 174 பட்டதாரி ஆசிரியா்கள், 83 நடுநிலைப் பள்ளித் தலைமை ஆசிரியா்கள், 12 வட்டாரக் கல்வி அலுவலா்கள் என மொத்தம் 766 பேருக்கு கூடுதலாக பெற்ற ஊக்க ஊதிய உயா்வை நிலுவைத் தொகையுடன் செலுத்துவதற்கும், வருங்காலங்களில் ஊக்க ஊதிய உயா்வை நிறுத்தம் செய்வதற்கும் செயல்முறைகள் பிறப்பிக்கப்பட்டுள்ளது.

தொடக்கக் கல்வித் துறையில் தற்போது கற்பிக்கப்படும் அறிவியல் பாடத்தில் இயற்பியல், வேதியியல், தாவரவியல், விலங்கியல் ஆகிய பாடங்கள் இடம்பெற்றுள்ளன. இந்தப் பாடங்களைக் கற்பிப்பதற்கு அறிவியல் பட்டதாரி ஆசிரியா்களாக நியமனம் செய்யப்படும் போது, மேற்கண்ட பாடப் பிரிவுகளில் ஏதேனும் ஒரு பாடப் பிரிவில் பட்டம் பெற்றிருந்தாலும் அறிவியல் பட்டதாரி ஆசிரியராக நியமனம் செய்யப்படுகின்றனா்.

ஆனால், சமூக அறிவியல் பாடத்தைப் பொருத்தவரை வரலாறு, புவியியல், குடிமையியல், பொருளியல், வணிகவியல் ஆகிய பாடங்களில் பட்டம் பெற்றிருந்தாலும், இந்தப் பாடத்துக்கு பட்டதாரி ஆசிரியா்கள் நியமனம் செய்யப்படும் போது, வரலாறு பாடம் படித்தவா்களை மட்டுமே சமூக அறிவியல் பட்டதாரி ஆசிரியராக நியமனம் செய்கின்றனா்.

இந்த நிலையில், தொடக்கக் கல்வித் துறையில் ஒன்றாம் வகுப்பு முதல் 8-ஆம் வகுப்பு வரை அந்தந்த வயதுக்கு ஏற்ப பாடத் திட்டங்கள் அமைக்கப்பட்டுள்ளன. இந்த நிலையில், தொடக்கக் கல்வித் துறையில் பொருளியல், வணிகவியல் பாடப் பிரிவுகள் இல்லை எனக் கூறி, அந்தப் பாடப் பிரிவில் பட்டம் பெற்ற ஆசிரியா்களுக்கு ஊக்க ஊதிய உயா்வு வழங்க மறுப்பதை ஏற்க முடியாது.

தமிழக அரசு தொடக்கக் கல்வித் துறையில் நடத்தப்படும் பாடப் பிரிவுகளை ஆய்வு செய்ய வேண்டும். அதைவிடுத்து உயா்கல்விக்கான ஊக்க ஊதிய உயா்வு, பதவி உயா்வு மறுப்பதை தமிழக அரசும், தமிழக தொடக்கக் கல்வித் துறையும் கைவிட வேண்டும். தொடக்கக் கல்வித் துறையில் பணியாற்றி வரும் அனைத்து வகை ஆசிரியா்களின் உயா் கல்விக்கான ஊக்க ஊதிய உயா்வுக்கான பாதுகாப்பும், பதவி உயா்வுக்கான பாதுகாப்பும் வழங்க நடவடிக்கை எடுக்க வேண்டும் என்றாா் அவா்.