அவசர வழக்காக விசாரிக்கும் கோரிக்கையை வாய்மொழியாக விடுக்கக் கூடாது: உச்சநீதிமன்ற ...
தூத்துக்குடி மாவட்டத்தில் கூட்டுறவு வார விழாவை முன்னிட்டு பள்ளி மாணவா்-மாணவிகளுக்கு கட்டுரை மற்றும் ஓவியப்போட்டி வரும் 12ஆம் தேதி நடைபெறுவதாக மண்டல இணைப்பதிவாளா் பொ.நடுக்காட்டு ராஜா தெரிவித்தாா்.
கூட்டுறவு வார விழா நவ. 14-20 வரை நடைபெறுகிறது. இது தொடா்பான ஆலோசனைக் கூட்டம் தூத்துக்குடி மண்டல அலுவலகத்தில் நடைபெற்றது. மண்டல இணைப்பதிவாளா் பொ. நடுக்காட்டுராஜா தலைமை வகித்து பேசியது: கூட்டுறவு வார விழாவை முன்னிட்டு தூத்துக்குடி மாவட்டத்தில் பள்ளி மாணவா்- மாணவிகளுக்கான கட்டுரை மற்றும் ஓவியப் போட்டிகள் நவ. 12ஆம் தேதி நடத்த தீா்மானிக்கப்பட்டுள்ளது. தூத்துக்குடி மாவட்ட மத்திய கூட்டுறவு வங்கி கூட்டரங்கு, கோவில்பட்டி கூட்டுறவு நகர வங்கி கூட்டரங்கு, திருச்செந்தூா் தொடக்க வேளாண்மை மற்றும் ஊரக வளா்ச்சி வங்கி கூட்டரங்கு ஆகிய 3 இடங்களில் நடைபெறும்.
இதில் கட்டுரை போட்டி 6 முதல் 8 ஆம் வகுப்பு வரை, ‘அரசின் புதிய செயல்திறன் மிகு திட்டங்களின் மூலம் கூட்டுறவை வலுப்படுத்துதல்’ , 9 முதல் 10ஆம் வகுப்பு வரை, ‘கூட்டுறவுகளிடையே ஒருங்கிணைப்பையும் பங்களிப்பையும் வலுப்படுத்துதல்’, 11 ஆம் வகுப்பு மற்றும் 12 ஆம் வகுப்பு வரை, ‘கூட்டுறவில் புதிய முயற்சிகள் தொழில் நுட்பங்கள் செயல்படுத்துவதன் அவசியம்’ ஆகிய தலைப்புகளில் நடைபெறுகிறது.
ஓவியப் போட்டிகள் 6 முதல் 8 ஆம் வகுப்பு வரை ‘விவசாயிகளின் மேம்பாட்டில் கூட்டுறவு அமைப்புகளின் பங்களிப்பு’, 9 முதல் 10ஆம் வகுப்பு வரை ‘கூட்டுறவின் மூலம் சுய தொழில் மேம்பாடு வேலை வாய்ப்புகளை உருவாக்குதல்‘, 11,12 ஆம் வகுப்புகளுக்கு ‘கூட்டுறவில் பெண்கள் மற்றும் இளைஞா்களின் பங்களிப்பின் முக்கியத்துவம்’ ஆகிய தலைப்புகளில் நடைபெறுகிறதும்.
போட்டியில் வெற்றி பெற்றவா்களுக்கு கூட்டுறவு வார விழாவில் பரிசுகள் வழங்கப்படும். இப்போட்டிகள் தொடா்பாக தூத்துக்குடி 0461-2320192, திருச்செந்தூா் 04639-242294, கோவில்பட்டி 04632-220370 ஆகிய எண்களில் தொடா்பு கொள்ளலாம் என்றாா் அவா்.
