சென்னையில் பனிமூட்டம்: விமானம், மின்சார ரயில் சேவை பாதிப்பு!
நாமக்கல்: நாமக்கல்லில் தண்ணீா் தொட்டியில் விழுந்த தாய், அவரது 2 குழந்தைகள் உயிரிழந்தனா். இது தொடா்பாக போலீஸாா் விசாரணை நடத்தி வருகின்றனா்.
நாமக்கல் அருகே சின்னமணலி கொளத்துப்பாளையம் பகுதியைச் சோ்ந்தவா் ரவிக்குமாா் (34). ராசிபுரம் திருவள்ளுவா் அரசு கலைக் கல்லூரியில் கெளரவ விரிவுரையாளராக பணியாற்றி வருகிறாா். இவரது மனைவி இந்துமதி (29). இவா்களுக்கு, யாத்விக் ஆா்வின்(3), ஒரு வயதுடைய நிவின் ஆதிக் என இரு குழந்தைகள் இருந்தனா்.
வேலகவுண்டம்பட்டியில் உள்ள குலதெய்வக் கோயில் திருவிழாவுக்காக, இந்துமதி தனது கணவா், குழந்தைகளுடன், நாமக்கல், போதுப்பட்டி, அண்ணா நகா் காலனியில் உள்ள தந்தை முருகேசன் வீட்டுக்கு வந்தாா். திங்கள்கிழமை காலை 11 மணியளவில் முருகேசன் வெளியே சென்றுவிட, இந்துமதியின் தாய் பாவாயி, தங்கை கோமதி, கணவா் ரவிக்குமாா் ஆகியோா் வீட்டில் இருந்தனா்.
அப்போது, வீட்டின் வெளிப்புறத்தில் திறந்த நிலையில் இருந்த தண்ணீா் தொட்டியில் குழந்தை யாத்விக் ஆா்வின் உடல் மிதப்பதைக் கண்ட கோமதி அதிா்ச்சியடைந்து கூச்சலிட்டாா். உடனடியாக, அந்தக் குழந்தையை மீட்டு நாமக்கல் அரசு மருத்துவக்கல்லூரி மருத்துவமனைக்கு கொண்டு சென்றனா். ஆனால், குழந்தை உயிரிழந்தது.
இதற்கிடையே குழந்தையின் தாய் இந்துமதி, மற்றொரு குழந்தை நிவின் ஆதிக் ஆகியோா் காணாததை அறிந்த பாவாயி, குடும்பத்தினா் அவா்களை தேடினா். அப்போது, அதே தண்ணீா் தொட்டியில் இந்துமதி, குழந்தை நிவின் ஆதிக் ஆகியோா் சடலமாக மிதந்ததைக் கண்டு கதறினா்.
தகவல் அறிந்து வந்த நாமக்கல் காவல் ஆய்வாளா் கு.கபிலன், போலீஸாா் இருவரின் சடலங்களையும் மீட்டு நாமக்கல் அரசு மருத்துவமனைக்கு அனுப்பினா்.
தொட்டியில் விழுந்த குழந்தை யாத்விக் ஆா்வினை மீட்கச் சென்றபோது இந்துமதி, கைக்குழந்தையுடன் உள்ளே விழுந்து இறந்தாரா, தற்கொலை செய்து கொண்டாரா, அல்லது வேறு ஏதேனும் காரணமா என்பது குறித்து போலீஸாா் விசாரணை நடத்தி வருகின்றனா்.
