நிதி நிறுவன உரிமையாளரின் மனைவி, 3 வயது மகள் கடத்தல்; 8 பேர் கைது - பின்னணி என்ன?

திருவண்ணாமலை மாவட்டம், செய்யாறு காமராஜர் நகரைச் சேர்ந்தவர் அல்தாப் தாசிப் (36). இவர் அதே பகுதியில் 'ஏ.பி.ஆர்' என்ற பெயரில் தனியார் நிதி நிறுவனத்தை நடத்தி வந்ததாகச் சொல்லப்படுகிறது.

திருவண்ணாமலை, வேலூர், திருப்பத்தூர், ராணிப்பேட்டை, காஞ்சிபுரம் உள்ளிட்ட பகுதிகளிலும் கிளை அலுவலகங்களை நடத்தி நிதி நிறுவனத்தை விரிவுப்படுத்தியதாகவும் கூறப்படுகிறது. தீபாவளி, பொங்கல், தமிழ்ப் புத்தாண்டு உள்ளிட்ட பண்டிகை கால சிறப்பு சேமிப்பு திட்டங்களைச் செயல்படுத்திய அல்தாப் தாசிப், கவர்ச்சிகரமான அறிவிப்பு மூலம் பல்லாயிரக்கணக்கான மக்களிடம் இருந்து பல கோடி ரூபாயை வசூல் செய்து மோசடியில் ஈடுபட்டதாகவும் புகார்கள் குவிந்தன.

பணத்தை இழந்த மக்கள் ஆத்திரத்தில், கடந்த ஆண்டு நவம்பர் மாதம் செய்யாறில் செயல்பட்டு வந்த ஏ.பி.ஆர் தலைமை அலுவலகத்தைச் சூறையாடினார்கள். அதைத்தொடர்ந்து, ஆந்திர மாநிலம் சித்தூரில் பதுங்கி இருந்த அல்தாப் தாசிப்பை போலீஸார் கைது செய்தனர். சிறையில் அடைக்கப்பட்டிருந்த அல்தாப் தாசிப் ஜாமீன் பெற்று, இப்போது வெளியில் இருக்கிறார். நிதி நிறுவன மோசடியில் ஈடுபட்டதால், அல்தாப் தாசிப்பிற்கு பலரோடு விரோதம் சூழ்ந்தது.

இந்த நிலையில், அல்தாப்தாசிப்பின் மனைவி சப்ரின் பேகம் மற்றும் 3 வயது மகள் அல்வினா ஆகிய இருவரும் சென்னையில் உள்ள உறவினர் வீட்டுக்குச் செல்ல காரில் புறப்பட்டபோது, ஒரு கும்பலால் கடத்திச் செல்லப்பட்டனர்.

ராணிப்பேட்டை நவல்பூரில் வசிக்கும் சப்ரின் பேகத்தின் தாய் ஹயாத்துன் பேகத்தைத் தொடர்புகொண்ட கடத்தல் கும்பலைச் சேர்ந்த ஒருவர், 'இருவரையும் விடுவிக்க வேண்டுமானால், 1 கோடி ரூபாய் தர வேண்டும்' என மிரட்டியிருக்கிறார். இது குறித்து உடனடியாக ராணிப்பேட்டை காவல் நிலையத்தில் புகாரளித்தார் ஹயாத்துன் பேகம்.

விரைந்து விசாரணையில் இறங்கிய ராணிப்பேட்டை போலீஸார், கடத்தல் கும்பலிடம் இருந்து வந்த செல்போன் நெம்பரின் சிக்னலை ஆய்வு செய்து பின்தொடர்ந்தபோது, ராணிப்பேட்டையில் இருந்து சோளிங்கர் செல்லக்கூடிய சாலையில் உள்ள கேஸ் குடோன் அருகே இருப்பதாகத் தெரியவந்தது.

அங்கு கடத்தல் கும்பலை மடக்கிப் பிடித்த போலீஸார், அல்தாப் தாசிப்பின் மனைவி சப்ரின்பேகம், அவரின் மகளை பத்திரமாக மீட்டனர். இதையடுத்து, கடத்தல் கும்பலைச் சேர்ந்த ராணிப்பேட்டையைச் சேர்ந்த வசந்தகுமார் (34), பார்த்திபன் (35), ருத்ரேஸ்வரன் (31), சரத்குமார் (31), கார்த்திக் (34), ஏசுதாஸ் (30), வினோத் (35) மற்றும் கோமதி (36) என்ற பெண் உட்பட மொத்தம் 8 பேரை கைது செய்த போலீஸார், விசாரணைக்குப் பிறகு சிறையில் அடைத்தனர். கைதானவர்களில் முதல் குற்றவாளியான வசந்தகுமாரும், அல்தாப்தாசிப் நடத்திய நிதி நிறுவனக் கிளை ஒன்றில் மேலாளராகப் பணிபுரிந்தவர்தான். அல்தாப்தாசிப்பிடம் இருந்து பணம் பறிக்கும் திட்டத்துடன் அவர் இந்த கடத்தலுக்குத் திட்டம் தீட்டி மூளையாகச் செயல்பட்டிருக்கிறார். இதனிடையே, கடத்தலுக்குப் பயன்படுத்தப்பட்ட 2 கார்களையும் பறிமுதல் செய்த போலீஸார், அதில் இருந்த ரூ.5 லட்சம் ரொக்கப் பணத்தையும் கைப்பற்றினர். இந்த வழக்கில் துரிதமாக செயல்பட்ட ராணிப்பேட்டை போலீஸார், எஸ்.பி கிரண் ஸ்ருதி வெகுவாகப் பாராட்டினார்.