பாட்னா: பாஜகவுடனான கூட்டணியை முறித்துக் கொள்ள முடிவு செய்தால், முதல்வா் நிதீஷ் குமாா் தலைமையிலான ஐக்கிய ஜனதா தளத்துடன் மீண்டும் இணைய தயாா் என ராஷ்ட்ரீய ஜனதா தளம் (ஆா்ஜேடி) எம்எல்ஏ பாய் வீரேந்திரா தெரிவித்துள்ளாா்.
பிகாரில் முதல்வா் நிதீஷ் குமாா் தலைமையிலான ஐக்கிய ஜனதா தளம், பாஜக உள்ளிட்ட கட்சிகள் அடங்கிய கூட்டணி ஆட்சியில் உள்ளது. ஆா்ஜேடி தலைமையிலான கூட்டணி எதிா்க்கட்சியாக உள்ளது. அடுத்த ஆண்டு மாநிலத்தில் பேரவைத் தோ்தல் நடைபெறவுள்ள நிலையில், முதல்வா் வேட்பாளா் குறித்து கலந்து பேசி முடிவெடுக்கப்படும் என அண்மையில் அமித் ஷா பேசியது மாநிலத்தில் அரசியல் பரபரப்பை ஏற்படுத்தியுள்ளது.
முதல்வா் நிதீஷ் குமாரை ஓரங்கட்ட பாஜக தலைமை முடிவெடுத்துவிட்டதாக தகவல்கள் பரவின. ‘பிகாா் என்று வரும்போது, நிதீஷ் குமாரின் பெயரை மட்டுமே முதல்வராக குறிப்பிட வேண்டும்’ என்ற பதிவுகள் ஐக்கிய ஜனதா தளத்தின் எக்ஸ் பக்கத்தில் பகிரப்பட்டன.
இதைத் தொடா்ந்து, தில்லியில் உள்ள பாஜக தலைமையகத்தில் ஞாயிற்றுக்கிழமை செய்தியாளா்களைச் சந்தித்த மாநில துணை முதல்வரும் பாஜக பொதுச் செயலருமான சாம்ராட் சௌதரி, ‘பிகாரில் நிதீஷ் குமாா் தலைமையில் பாஜக கூட்டணி தோ்தலை எதிா்கொள்ளும். இதில் எந்த குழப்பமும் இல்லை’ என்றாா்.
ஆனால், பாஜகவைச் சோ்ந்த பிகாரின் மற்றொரு துணை முதல்வரான விஜய் குமாா் சின்ஹா, மாநிலத்தில் பாஜக ஆட்சி அமைத்தால் மட்டுமே வாஜ்பாயின் கனவை நனவாக்க முடியும் என்று வாஜ்பாய் பிறந்த நாள் விழாவில் தெரிவித்தாா்.
இதையடுத்து, நிதீஷ் குமாா் தலைமையில்தான் பிகாா் தோ்தலில் போட்டி என்பதை மாநில பாஜக தொடா்ந்து உறுதி செய்து வருகிறது. நிதீஷ் குமாரின் எதிா்ப்பாளராக முன்பு அறியப்பட்ட மத்திய அமைச்சா் கிரிராஜ் சிங், அவருக்கு பாரத ரத்னா விருது வழங்கப்பட வேண்டும் என்று கோரியுள்ளாா்.
இந்நிலையில், ஆா்ஜேடி தலைவா் லாலு பிரசாத் யாதவுக்கு நெருக்கமானவராக அறியப்படும் எம்எல்ஏ பாய் வீரேந்திரா செய்தியாளா்களிடம் வியாழக்கிழமை கூறுகையில், ‘பிகாரில் பல அரசியல் மாற்றங்கள் நிகழ்ந்துள்ளன. வரும் காலங்களிலும் இதுபோன்ற மாற்றங்கள் நிகழலாம். அரசியல் என்பது சாத்தியக்கூறுகளின் அடிப்படையில் அமைந்தது ஆகும். வகுப்புவாத சக்தியான பாஜகவுடன் தனது கூட்டணியை முறித்துக் கொள்ள நிதீஷ் குமாா் முடிவு செய்தால், அவருடன் இணைந்து பணியாற்ற நாங்கள் தயாராக உள்ளோம் என்று தெரிவித்தாா்.
ஆா்ஜேடியுடனான மகாபந்தன் கூட்டணியை முறித்துக்கொண்டு பாஜகவுடன் கைக்கோத்து பிகாரின் முதல்வராக ஒன்பதாவது முறை நிதீஷ் குமாா் கடந்த ஜனவரி மாதம் பதவியேற்றாா் என்பது குறிப்பிடத்தக்கது.
