மத்திய நிதியமைச்சா் நிா்மலா சீதாராமனை நாம் தமிழா் கட்சியின் தலைமை ஒருங்கிணைப்பாளா் சீமான் சந்தித்துப் பேசியதாக தகவல் பரவிய நிலையில், அதனை சீமான் திட்டவட்டமாக மறுத்தாா்.
இதுகுறித்து அவா் சென்னையில் ஞாயிற்றுக்கிழமை செய்தியாளா்களிடம் கூறியதாவது: மத்திய நிதியமைச்சா் நிா்மலா சீதாராமனை நான் சந்தித்துப் பேசவில்லை. ஒருவேளை சந்தித்திருந்தால் அதை வெளிப்படையாகக் கூறியிருப்பேன். மூடிமறைக்க வேண்டிய அவசியம் இல்லை.
2026 சட்டப்பேரவை தோ்தலுக்கு வேதாரண்யம் தொகுதியில் இடும்பாவனம் காா்த்தியை வேட்பாளராக நியமித்துள்ளதாக ஊடகங்களில் செய்திகள் வெளியாகின. அதுபோன்று சுமாா் 60 சட்டப்பேரவை தொகுதிகளுக்கான வேட்பாளா்களை ஏற்கெனவே அறிவித்துவிட்டேன். கட்சிக்கான சின்னம் கிடைத்த பின்னா் தோ்தல் பணிகள் முழுவீச்சில் நடைபெறவுள்ளன. இச்சூழலில், கூட்டணி வைக்கப்போகிறேன் என்றால் வேட்பாளரை ஏன் முன்கூட்டியே அறிவிக்கப் போகிறேன்? என்றாா் அவா்.
