நீட் தோ்வு: 7.5 சதவீத இட ஒதுக்கீட்டில் நாமக்கல் அரசுப் பள்ளி மாணவி மாநிலத்தில் முதலிடம்

நீட் தோ்வில் நாமக்கல் மாவட்டம், பாச்சல் அரசுப் பள்ளி மாணவி இ.மெய்யரசி 720க்கு 547 மதிப்பெண்களுடன் மாநில அளவில் முதலிடம் பெற்றுள்ளாா்.

நாடு முழுவதும் இளநிலை மருத்துவப் படிப்புகளில் சோ்வதற்கான (எம்பிபிஎஸ், பல் மருத்துவம், ஆயுா்வேதா, சித்தா, யுனானி, அகில இந்திய ஒதுக்கீட்டில் கால்நடை மருத்துவம்) தேசிய தகுதிகாண் நுழைவுத் தோ்வை தேசிய தோ்வுகள் முகமை மே 4 ஆம் தேதி நடத்தியது.

கடந்த ஆண்டு பிகாா், உத்தர பிரதேச மாநிலங்களில் நடைபெற்ற நீட் தோ்வில் முறைகேடுகள் நடைபெற்ால் நிகழாண்டு அரசுப் பள்ளி, அரசு கல்லூரிகள் தோ்வு மையங்களாக செயல்பட்டன. நாமக்கல் மாவட்டத்தில் 14 மையங்களில் 5,926 மாணவ, மாணவிகள் இத் தோ்வை எழுதினா்.

தோ்வு கடினமாக இருந்ததாகக் கூறப்பட்டது. இந்த நிலையில், கடந்த 14-ஆம் தேதி தோ்வு முடிவுகள் அறிவிக்கப்பட்டன. ராஜஸ்தானைச் சோ்ந்த மகேஷ்குமாா் என்ற மாணவா் அகில இந்திய அளவில் 683 மதிப்பெண்களுடன் முதலிடம் பிடித்தாா்.

தமிழகத்தில் நெல்லையைச் சோ்ந்த சூரியநாராயணன் என்ற மாணவா் 665 மதிப்பெண்களுடன் முதலிடம் பெற்றாா். 7.5 சதவீத இட ஒதுக்கீட்டின் கீழ் மருத்துவக் கல்லூரியில் சோ்க்கை பெற தமிழக அளவில் அரசுப் பள்ளிகளில் பயின்று நீட் தோ்வு எழுதியவா்களில் நாமக்கல் மாவட்டம், பாச்சல் அரசு மேல்நிலைப் பள்ளி மாணவி மெய்யரசி 720க்கு 547 மதிப்பெண்களுடன் முதலிடம் பெற்றுள்ளாா்.

இவா் 2024-ஆம் ஆண்டு நீட் தோ்வை எதிா்கொண்ட போதும் அவருக்கு மருத்துவக் கல்லூரியில் சோ்வதற்கு வாய்ப்பு கிடைக்கவில்லை. இரண்டாவது முறையாக தோ்வை எதிா்கொண்டு மாநில அளவில் முதலிடம் பிடித்து சாதனை படைத்துள்ளாா்.

நாமக்கல் மாவட்டத்தை பொருத்தமட்டில் மொத்தம் 328 அரசுப் பள்ளி மாணவ, மாணவிகள் நீட் தோ்வை எழுதினா். இதில், 300 க்கு மேல் மதிப்பெண் பெற்ற 46 போ் மருத்துவக் கல்லூரியில் சோ்வதற்கான வாய்ப்பை பெற்றுள்ளனா்.

7.5 சதவீத இட ஒதுக்கீட்டில் மாவட்ட அளவில் மெய்யரசி முதலிடம், வெண்ணந்தூா் அரசுப் பள்ளி மாணவா் சாய்சரத்குமாா், வெண்ணந்தூா் அரசு மகளிா் பள்ளி மாணவி அபிநயா மற்றும் வளையப்பட்டி அரசுப் பள்ளி மாணவா் யுவராஜ், மாணவி மித்ரா, மல்லசமுத்திரம் பள்ளி லத்திகா ஆகியோா் அடுத்தடுத்த இடங்களை பிடித்துள்ளனா். மேலும், பொதுப்பிரிவில் குறைந்தபட்சம் 144 மதிப்பெண்கள், மாற்றுத்திறனாளிகள் பிரிவில் 127 மதிப்பெண்கள், தாழ்த்தப்பட்டோா் பிரிவில் 113 மதிப்பெண்களை பெற்றுள்ளனா்.

நீட் தோ்வில் மாநில அளவில் முதலிடம் பெற்றது குறித்து மாணவி இ.மெய்யரசி கூறியதாவது: ராசிபுரம் வட்டம், அணைப்பாளையம் அருகே முருங்கப்பட்டி கிராமத்தில் வசிக்கிறேன். தந்தை இதயகாந்தன் மெக்கானிக்காக உள்ளாா். தாய் புவனேஸ்வரி. கடந்த 2024 பிளஸ் 2 தோ்வில் 600-க்கு 576 மதிப்பெண்கள் பெற்றேன். நீட் தோ்வை எதிா்கொண்ட நிலையில் 478 மதிப்பெண்கள் மட்டுமே பெறமுடிந்தது.

மருத்துவக் கல்லூரியில் சேர வாய்ப்பு கிடைக்கவில்லை. தொழில்நுட்பக் கல்லூரி, பொறியியல் கல்லூரியில் சேர வாய்ப்பு வந்தபோதும், மருத்துவக் கனவை நனவாக்க விரும்பி 2025-இல் மீண்டும் நீட் தோ்வை எழுதி 720-க்கு 547 மதிப்பெண்களை பெற்று அரசுப் பள்ளி அளவில் மாநிலத்தில் முதலிடம் பிடித்துள்ளேன். நீட் தோ்வுக்கு என்னை தயாா்படுத்திய எங்களுடைய பாச்சல் அரசுப் பள்ளி தலைமை ஆசிரியா், இதர ஆசிரியா்களுக்கும், பெற்றோருக்கும் இந்த நேரத்தில் நன்றியைத் தெரிவித்துக் கொள்கிறேன் என்றாா்.