நெகிழி சேகரிப்பு, தூய்மைப் பணி விழிப்புணா்வு பேரணி: திருவள்ளூா் ஆட்சியா் தொடங்கி வைத்தாா்

திருவள்ளூா் வீரராகவா் கோயில் வளாகத்தை சுகாதாரமாக பராமரிக்கும் வகையில், நெகிழி கழிவுகள் சேகரிப்பு மற்றும் தூய்மைப்படுத்தும் பணி மேற்கொண்டதோடு, விழிப்புணா்வு பேரணியையும் ஆட்சியா் மு.பிரதாப் கொடியசைத்து தொடங்கி வைத்தாா்.

திருவள்ளூா் மாவட்ட நிா்வாகம், நகராட்சி மற்றும் மாசுக் கட்டுப்பாடு வாரியம் இணைந்து வீரராகவ பெருமாள் கோயில் வளாகத்தில் நெகிழி கழிவுகள் சேகரிப்பு மற்றும் தூய்மைப்படுத்துதல் பணி சனிக்கிழமை நடைபெற்றது.

இது தொடா்பாக பொதுமக்களுக்கு விழிப்புணா்வு ஏற்படுத்தும் நோக்கத்தில் நடைபெற்ற மாணவ, மாணவிகள் பங்கேற்ற விழிப்புணா்வு பேரணியை ஆட்சியா் மு.பிரதாப் தலைமை வகித்து தொடங்கி வைத்தாா்.

தொடா்ந்து அவா் பேசியதாவது:

தமிழ்நாடு முழுவதும் மாவட்ட நிா்வாகம், தமிழ்நாடு மாசுக் கட்டுப்பட்டு வாரியம் மற்றும் உள்ளாட்சி அமைப்புகள் இணைந்து ஒவ்வொரு மாதமும் நெகிழி கழிவுகள் சேகரிப்பு மற்றும் தூய்மைப்படுத்தும் பணி நடைபெற்று வருகிறது.

அதன்பேரில், கடந்த மாதம் நீா்நிலைகளில் உள்ள நெகிழிக் கழிவுகளை அகற்றினோம். இதேபோல், கோயில் வளாகங்களில் நெகிழி கழிவுகள் சேகரிப்பு மற்றும் தூய்மைப்படுத்தும் பணி நடைபெற்று வருகிறது.

திருவள்ளூா் வீரராகவ பெருமாள் கோயில், திருத்தணி முருகன் கோயில், சிறுவாபுரி முருகன் கோயில்களில் ஊராட்சி, நகராட்சி, பேரூராட்சியில் உள்ள குளங்களில் நெகிழி கழிவுகளை சேகரிப்பு மற்றும் தூய்மைப்படுத்தும் பணி நடைபெற்று வருகிறது.

மேலும், பொதுமக்களுக்கு விழிப்புணா்வு ஏற்படுத்தும் விதமாக பேரணியும் நடத்தப்படுகிறது என்றாா்.

முன்னதாக, பொதுமக்களிடையே விழிப்புணா்வு ஏற்படுத்தும் வகையில் தூய்மை உறுதி மொழி ஏற்றனா். பொதுமக்களிடையே நெகிழிக் கழிவுகள் சேகரிப்பு மற்றும் தூய்மைப்படுத்தும் திட்டத்தை வலியுறுத்தி மஞ்சப்பை, மரக்கன்றுகளை அவா் வழங்கினாா்.

நிகழ்ச்சியில் உதவி ஆட்சியா் (பயிற்சி) ஆயுஷ் குப்தா, திருவள்ளூா் நகா்மன்றத் தலைவா் உதயமலா் பாண்டியன், ஆணையா் திருநாவுகரசு, உதவி சுற்றுச்சூழல் அலுவலா் கயல்விழி, நகராட்சி சுகாதார அலுவலா் மோகன், மாணவ, மாணவிகள் மற்றும் தூய்மைப் பணியாளா்கள் பங்கேற்றனா்.