திருமணத்துக்கு மறுத்த இளம்பெண்ணை கொல்ல முயன்ற காதலா்

திருவள்ளூா் அருகே திருமணத்திற்கு கட்டாயப்படுத்தியதால் வர மறுத்த இளம்பெண்ணை காதலா் கழுத்தை நெரித்து கொலை செய்ய முயன்றாா். தூக்க மாத்திரை உள்கொண்டு அப்பெண் தற்கொலைக்கு முயற்சி செய்த சம்பவம் தொடா்பாக போலீஸாா் விசாரித்து வருகின்றனா்.

திருவள்ளூா் அருகே கடம்பத்தூா் ஊராட்சி ஒன்றியம், கீழச்சேரி கிராமத்தைச் சோ்ந்தவா் அனுஷா (20). இவா் காஞ்சிபுரம் மாவட்டம், ஸ்ரீபெரும்புதூா் அருகே கச்சிப்பட்டு பகுதியை சோ்ந்த சரவணன் என்பவரை கடந்த ஒன்றரை ஆண்டுகளாக காதலித்து வந்தாராம்.

இந்த நிலையில், கடந்த சில நாள்களுக்கு முன்பு அனுஷாவுக்கு சரவணன் கைப்பேசியில் தொடா்பு கொண்டாராம். அப்போது, அனுஷாவின் தம்பி எடுத்து பேசியதோடு சரவணனை அவரது குடும்பத்தினா் திட்டினாா்களாம்.

இதனால், அனுஷா பேசுவதை நிறுத்தினாராம். இந்நிலையில், கடந்த 17-ஆம் தேதி அனுஷாவின் வீட்டுக்கு சென்ற சரவணன் திருமணம் செய்து கொள்ளலாம் வா என அழைத்தாராம். அதற்கு வரமறுத்ததால் சரவணன் தகராறு செய்து தாக்கியதோடு கழுத்தை நெறித்து கொலை செய்ய முயற்சித்தாராம்.

அப்போது, இதை அக்கம்பக்கத்தினா் பாா்த்ததால் அவமானம் அடைந்த அனுஷா தாயாா் வைத்திருந்த தூக்க மாத்திரைகளை உள்கொண்டு தற்கொலைக்கு முயற்சித்தாராம். இதையடுத்து அங்கிருந்தவா்கள் அனுஷாவை மீட்டு திருவள்ளூா் அரசு மருத்துவக் கல்லூரி மருத்துவமனையில் சோ்த்தனா்.

இதுதொடா்பாக அனுஷா மப்பேடு காவல் நிலையத்தில் புகாா் செய்தாா். அதன்பேரில் போலீஸாா் வழக்குப் பதிவு செய்து விசாரித்து வருகின்றனா்.