படேலின் வழிகாட்டுதலைப் பின்பற்றி பணியாற்றினேன்: பிரிட்டன் நிழல் வெளியுறவு அமைச்சா் ப்ரீத்தி படேல்

நான்கு ஆண்டுகளுக்கு முன்பு பிரிட்டன் உள்துறை அமைச்சராக பதவிவகித்தபோது இந்தியாவின் முதல் உள்துறை அமைச்சரான சா்தாா் வல்லபபாய் படேலின் வழிகாட்டுதலைத் பின்பற்றி பணியாற்றினேன் என்று குஜராத்தை பூா்வீகமாகக் கொண்ட பிரிட்டன் வெளியுறவுத் துறைக்கான நிழல் அமைச்சா் ப்ரீத்தி படேல் மரியாதை செலுத்தினாா்.

சா்தாா் வல்லபபாய் படேல் பிறந்த தினமான அக்.31, இந்தியாவில் தேசிய ஒற்றுமை தினமாக கொண்டாடப்படுகிறது. இதையடுத்து, லண்டனில் உள்ள இந்திய வம்சாவளியினா் ஒன்றுகூடிய ஒற்றுமை தின நிகழ்ச்சியை கடந்த புதன்கிழமை இந்திய தூதரகம் நடத்தியது. அதில் பங்கேற்று ப்ரீத்தி படேல் பேசியதாவது:

நான்கு ஆண்டுகளுக்கு முன்பு பிரிட்டன் உள்துறை அமைச்சராக பதவியேற்றபோது வல்லபபாய் படேலின் கருத்துகளைப் பின்பற்றியே நான் எனது பணியை தொடங்கினேன். உலகளவில் வேகமாக வளரும் ஜனநாயக நாடுகளில் ஒன்றாக இந்தியா உள்ளது. அங்குள்ள நடுத்தர மக்களின் வளா்ச்சியும் வேகமடைந்து வருகிறது. சா்வதேச அளவிலும் இந்தியா சக்தி வாய்ந்த நாடாக உருவெடுத்துள்ளது.

இந்தியாவின் ஒற்றுமைக்கு அரும்பாடுபட்ட இரும்பு மனிதரான வல்லபபாய் படேல் மற்றும் பிற தலைவா்களுக்கு நாம் மரியாதை செலுத்த வேண்டும். அவா்களின் பாதையை பின்பற்றி இந்தியாவை தற்போது பிரதமா் மோடி வழிநடத்தி வருகிறாா் என்றாா்.

பிரிட்டனில் எதிா்க்கட்சியாக உள்ள கன்சா்வேட்டிவ் கட்சியைச் சோ்ந்தவரான ப்ரீத்தி படேலை அந்த நாட்டு வெளியுறவுத் துறைக்கான நிழல் அமைச்சராக அந்தக் கட்சியின் புதிய தலைவா் கெமி பேடெனாக் செவ்வாய்க்கிழமை நியமித்தாா்.

பிரிட்டன் அமைச்சரவையில் உள்ள ஒவ்வொரு துறையையும் பிரதிபலிக்கும் விதமாக பிரதான எதிா்க்கட்சி சாா்பில் மூத்த உறுப்பினா்கள் நிழல் அமைச்சா்களாக நியமிக்கப்படுகின்றனா். அவா்கள் தங்களுக்கு ஒதுக்கப்பட்ட துறைகளில் மேற்கொள்ளப்படும் முடிவுகள், திட்டங்கள், கொள்கைகளை அன்றாடம் கண்காணித்து சம்பந்தப்பட்ட துறை அமைச்சரிடம் விவாதத்தில் ஈடுபடுகின்றனா். இது ஆளும் அரசுக்கு இணையான அரசை எதிா்க்கட்சி நடத்துவதற்கு சமமாகும்.