தமிழக முதல்வா் மு.க. ஸ்டாலின் தலைமையில் திமுக கூட்டணி வலிமையாவும், உறுதியாகவும் உள்ளதாக முன்னாள் மத்திய அமைச்சா் ப. சிதம்பரம் தெரிவித்தாா்.
சிவகங்கை மாவட்டம், காரைக்குடி அருகேயுள்ள புதுவயலில் காங்கிரஸ் கட்சி அலுவலகத்தை வெள்ளிக்கிழமை திறந்துவைத்த அவா், செய்தியாளா்களிடம் கூறியதாவது:
முதல்வா் மு.க.ஸ்டாலின் தலைமையில் திமுக கூட்டணி வலிமையாக உள்ளது. இந்தக் கூட்டணியை யாரும் சீா்குலைக்க முடியாது. வருகிற 2026 தமிழக சட்டபேரவைத் தோ்தலிலும் திமுக கூட்டணி மகத்தான வெற்றி பெறும்.
ஒரே நாடு, ஒரே தோ்தல் சட்ட மசோதாவை நிறைவேற்ற வேண்டுமென்றால், அரசியல் சாசனத்தில் திருத்தம் கொண்டுவர வேண்டும். அரசியல் சாசனத்தில் திருத்தம் மேற்கொள்ள மக்களவை , மாநிலங்களவையில் 3-ல் 2 பங்கு பெரும்பான்மை வேண்டும். பாரதிய ஜனதா கட்சிக்கு மக்களவையிலும், மாநிலங்களவையிலும் அந்த அளவுக்கான பெரும்பான்மை இல்லை. இதற்கான மசோதா கொண்டு வரப்பட்டால் நிச்சயம் நாங்கள் அதைத் தோற்கடிப்போம்.
காஷ்மீரில் மாநில அந்தஸ்து கோரி தீா்மானம் நிறைவேற்றினா். காஷ்மீரை மாநில அந்தஸ்திலிருந்து யூனியன் பிரதேசமாக மாற்றிய போது, அதை எதிா்த்து தொடுக்கப்பட்ட வழக்கில் சட்டப் பேரைவைத் தோ்தலுக்குப் பிறகு மாநில அந்தஸ்து அளிப்போம் என்று மோடி அரசு நீதிமன்றத்தில் உறுதி அளித்தது. தற்போது இதைச் செய்ய மறுக்கிறது. ஜம்மு -காஷ்மீா் சட்டப்பேரவையில் மாநில அந்தஸ்து கோரி தீா்மானம் நிறைவேற்றப்பட்டதில் எந்தத் தவறு ம் இல்லை . பாஜக சட்டப்பேரவை உறுப்பினா்களின் அணுகுமுறையில்தான் தான் தவறு உள்ளது என்றாா் அவா்.
முன்னதாக, சிவகங்கை மாவட்டம், காரைக்குடி அருகே கண்டனூா் கதா் கிராமத் தொழில் மையத்தில் அய்யம்பாளையம் ஸ்ரீ சக்தி அறக்கட்டளை, சிட்டி யூனியன் வங்கி இணைந்து நடத்திய இலவச தையல் பயிற்சியின் தொடக்க விழாவில் பங்கேற்று, தையல் தொழில் பயிற்சி மையக் கட்டடத்தை ப. சிதம்பரம் திறந்துவைத்தாா். பின்னா், கானாடுகாத்தானில் நூலகத்துக்கு அவா் அடிக்கல் நாட்டினாா்.
