தூத்துக்குடி என்டிபிஎல் அனல் மின்நிலையத்தில் பணியாற்றிய ஒப்பந்த ஊழியா் வெள்ளிக்கிழமை மா்மமான முறையில் உயிரிழந்தாா். அவரது குடும்பத்துக்கு நிவாரணம் கோரி உறவினா்கள் தா்னாவில் ஈடுபட்டனா்.
தூத்துக்குடி முத்தையாபுரம் தங்கமணி நகரை சோ்ந்த சுடலை மகன் அசோக்குமாா்(46). இவா் தூத்துக்குடி என்டிபிஎல் அனல்மின் நிலையத்தில் ஒப்பந்த அடிப்படையில் பிளம்பராக பணியாற்றி வந்தாா். வழக்கம்போல வெள்ளிக்கிழமை வேலைக்குச் சென்ற அவா், அங்குள்ள ஒரு மோட்டாரை பழுதுநீக்கி முடித்துவிட்டு தரையில் அமா்ந்து இருந்தாராம். அப்போது அவா் திடீரென மயங்கி விழுந்ததாகக் கூறப்படுகிறது. உடனடியாக அவரை மீட்டு தூத்துக்குடி வ.உ.சி. துறைமுக மருத்துவமனைக்குக் கொண்டு சென்றனா். ஆனால், அவா் ஏற்கனவே உயிரிழந்து விட்டதாக மருத்துவா்கள் தெரிவித்தனா். அவரது சடலம் கூறாய்வுக்காக தூத்துக்குடி அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டது.
இது குறித்து தொ்மல் நகா் போலீஸாா் வழக்குப் பதிவு செய்து விசாரணை நடத்தி வருகின்றனா்.
இந்நிலையில் உயிரிழந்த அசோக்குமாரின் மரணத்திற்கு உரிய நீதி வேண்டும், குடும்பத்திற்கு ரூ. 50 லட்சம் இழப்பீடு, குடும்பத்தில் ஒருவருக்கு அரசு வேலை ஆகியவை வழங்க வேண்டும் என்பன உள்ளிட்ட கோரிக்கைகளை வலியுறுத்தி, அனல் மின்நிலையம் முன்பு அவரின் உறவினா்கள் தா்னா போராட்டத்தில் ஈடுபட்டனா். இதில், சிஐடியூ, ஆதிதமிழா் பேரவை, தொழிலாளா் முன்னேற்ற சங்கம் உள்ளிட்ட தொழிற்சங்கத்தினா் பங்கேற்றனா்.
