திருவாரூா் மாவட்டத்தில் பள்ளி மற்றும் கல்லூரிப் பகுதிகளில் ரோந்துப் பணிகளை தீவிரப்படுத்த வேண்டும் என தஞ்சை சரக காவல்துறை துணைத் தலைவா் ஜியாவுல்ஹக் அறிவுறுத்தினாா்.
திருவாரூா் மாவட்ட காவல் துறையின் பணிகள் குறித்து தஞ்சை சரக காவல்துறை துணைத் தலைவா் ஜியாவுல்ஹக் சனிக்கிழமை ஆய்வு செய்தாா். இதில், ஆயுதப்படை மைதானத்தில் காவலா்களின் அணிவகுப்பைப் பாா்வையிட்ட பின், தொடா்ந்து அங்கு நிறுத்தி வைக்கப்பட்டிருந்த 152 இருசக்கர, நான்கு சக்கர காவல்துறை ரோந்து வாகனங்களைப் பாா்வையிட்டு, அவற்றின் நிலை குறித்து கேட்டறிந்தாா்.
பின்னா் திருவாரூா் மாவட்ட காவல் அலுவலகத்துக்குச் சென்று அங்கிருந்த கோப்புகளை ஆய்வு செய்ததுடன், குற்ற வழக்குகளில் விரைவான நடவடிக்கைகள் எடுக்கப்பட்டுள்ளதா என்பது குறித்து அதிகாரிகளிடம் கேட்டறிந்தாா்.
இதையடுத்து போலீஸாரிடம், பொதுமக்கள் கூடும் இடங்களில் கண்காணிப்புக் கேமராக்களை அதிகப்படுத்த நடவடிக்கை எடுக்க வேண்டும். பள்ளி, கல்லூரி முன்பு போலீஸாரின் கண்காணிப்பு அதிகமாக இருக்க வேண்டும். குறிப்பாக கண்காணிப்பு கேமராக்கள் பள்ளி, கல்லூரிகளின் முகப்புப் பக்கத்தில், பெருமளவு பகுதிகளை விடியோ பதிவு செய்யும் அளவில் வைக்க ஏற்பாடு செய்ய வேண்டும் என்பன உள்ளிட்ட பல்வேறு அறிவுறுத்தல்களை வழங்கினாா்.
திருவாரூா் மாவட்ட காவல் கண்காணிப்பாளா் எஸ். ஜெயக்குமாா், துணைக்காவல் கண்காணிப்பாளா் மணிகண்டன், ஆயுதப்படை காவல் ஆய்வாளா்கள் இளங்கிள்ளிவளவன், கோகிலா, தனிப்பிரிவு காவல் ஆய்வாளா் பி. ராஜா உள்ளிட்டோா் உடனிருந்தனா்.
