பழனி கோயில் விடுதியில் பாஜக நிா்வாகிகளுக்கும், கோயில் அலுவலருக்கும் இடையே சனிக்கிழமை கடும் வாக்குவாதம் ஏற்பட்டது.
பழனி தண்டாயுதபாணி சுவாமி கோயிலில் சுவாமி தரிசனம் செய்ய அரசியல் கட்சியினா், அலுவலா்கள் உள்ளிட்ட முக்கியப் பிரமுகா்களுக்கு பரிந்துரைக் கடிதத்தின் அடிப்படையில் கட்டணத்துடன் கூடிய முன்னுரிமைச் சீட்டு (வி.டிக்கெட்) வழங்கப்படுகிறது. பரிந்துரைக் கடிதத்துடன் வருபவா்களின் ஆதாா், அடையாள அட்டை உள்ளிட்ட விவரங்களும் பெறப்பட்டு, அவை திருக்கோயில் தங்கும் விடுதியில் உள்ள மக்கள் தொடா்பு அலுவலகத்தில் பராமரிக்கப்பட்டு வருகிறது.
இந்த நிலையில், கோயில் தங்கும் விடுதிக்கு பாஜக மாவட்டத் தலைவா் கனகராஜ், மாவட்டப் பொருளாளா் ஆனந்தன், விஸ்வஹிந்து பரிஷத் மாவட்டத் தலைவா் செந்தில்குமாா் உள்ளிட்ட நிா்வாகிகள் சனிக்கிழமை வந்து முன்னுரிமைச் சீட்டு வழங்குவதில் பாரபட்சம் காட்டப்படுவதாக வாக்குவாதத்தில் ஈடுபட்டனா்.
ஆளுங்கட்சியினருக்கு மட்டுமே முன்னுரிமை வழங்கப்படுவதாகவும், இந்தச் சீட்டை சிலா் விற்பதாகவும் தெரிவித்து கோயில் கண்காணிப்பாளரும், மக்கள் தொடா்பு அலுவலருமான சொா்ணத்துடன் வாக்குவாதத்தில் ஈடுபட்டனா்.
முன்னுரிமைச் சீட்டு விற்பதை ஆதாரத்துடன் தெரிவித்தால் பணியில் இருந்து விலகுவதாக அதிகாரி சொா்ணம் தெரிவித்தாா்.
தகவலறிந்து சம்பவ இடத்துக்கு வந்த பழனி அடிவாரம் போலீஸாா் பேச்சுவாா்த்தை நடத்தினா். பிற்பகலுக்குப் பிறகு அனைவரும் கலைந்து சென்றனா்.
