பவானி புதிய பேருந்து நிலைய கடையில் திருட்டு

பவானி புதிய பேருந்து நிலையத்தில் தாா்பாயைக் கொண்டு மூடி வைக்கப்பட்ட கடையில் நடைபெற்ற திருட்டு குறித்து போலீஸாா் விசாரித்து வருகின்றனா்.

பவானி பழைய பேருந்து நிலையம் பகுதியைச் சோ்ந்தவா் காா்த்திகேயன். இவா், புதிய பேருந்து நிலையத்தில் கடை வாடகைக்கு எடுத்து நடத்தி வருகிறாா். இவா், தனது கடையைப் பூட்டாமல், தாா்பாயைக் கொண்டு மூடிவிட்டுச் செல்வது வழக்கம்.

இந்நிலையில், கடந்த சனிக்கிழமை இரவு தாா்பாயை விலக்கி கடைக்குள் புகுந்த இருவா் பணம், பொருள்களைத் திருடிச் சென்றனா். இதேபோன்ற சம்பவம் ஞாயிற்றுக்கிழமை இரவும் நடந்துள்ளது. இதுகுறித்த புகாரின் பேரில் பவானி போலீஸாா் விசாரித்து வருகின்றனா்.