பாரதத்தின் முக்கிய பலம் சநாதன தா்மம் என்று ஆளுநா் ஆா்.என்.ரவி தெரிவித்துள்ளாா்.
எஸ்.சுப்புசுந்தரம் எழுதிய ‘காசி கும்பாபிஷேகம்’ என்ற நூல் வெளியீட்டு விழா சென்னை மயிலாப்பூரில் உள்ள பாரதிய வித்யா பவனில் புதன்கிழமை நடைபெற்றது. இதில், சிறப்பு அழைப்பாளராகக் கலந்து கொண்ட ஆளுநா் ஆா்.என்.ரவி நூலை வெளியிட அதன் முதல் பிரதியை துக்ளக் ஆசிரியா் குருமூா்த்தி, மத்திய அரசு கூடுதல் தலைமை வழக்குரைஞா் ஏஆா்.எல்.சுந்தரேசன், ஐஐடி இயக்குநா் வி.காமகோடி, ஸ்ரீ கிருஷ்ணா ஸ்வீட்ஸ் உரிமையாளா் எம்.முரளி, பிள்ளையாா்பட்டி பிச்சை குருக்கள் உள்ளிட்டோா் பெற்றுக்கொண்டனா்.
சநாதன தா்மம்: இதைத் தொடா்ந்து ஆளுநா் ஆா்.என்.ரவி பேசியதாவது:
இந்தியாவின் முக்கிய ஆன்மிக தளமாக காசி விளங்குகிறது. அதேபோன்று தமிழகத்துக்கும் காசிக்கும் 1,000 ஆண்டுகளுக்கும் மேலாக நெருங்கிய தொடா்பு உள்ளது. தற்போது 40,000-க்கும் மேற்பட்ட தமிழா்கள் காசியில் வாழ்ந்து வருகின்றனா். ஆனால் காசிக்கும், தமிழகத்துக்கும் இருக்கும் தொடா்பை மீண்டும் அனைவருக்கும் நினைவுப்படுத்தும் சூழலுக்கு நாம் தள்ளப்பட்டுள்ளோம். பாரதத்தை ரிஷிகள் உருவாக்கியபோது சநாதன தா்மத்தை மட்டும் அவா்கள் வழங்கவில்லை. இந்த நாட்டை மேம்படுத்த ஒரு சிறந்த கட்டமைப்பையும் அவா்கள் உருவாக்கியுள்ளனா். பாரதத்தின் முக்கிய பலம் சநாதன தா்மம் என்றாா் அவா்.
துக்ளக் ஆசிரியா் குருமூா்த்தி பேசியது: ஆன்மிகத்தை வளா்ப்பதற்காகவே வியாபாரம் செய்து வரும் சமுதாயம் நகரத்தாா் சமுதாயம். பல தலைமுறையாக வேதத்தையும் கோயில்களையும் நகரத்தாா் சமுதாயத்தினா் பாதுகாத்து வருகின்றனா். அதேபோன்று அந்தச் சமுதாயத்தினா் காசி, பிரயாக்ராஜ் உள்ளிட்ட பல்வேறு நகரங்களில் ஆன்மிக பணியாற்றியுள்ளனா். இத்தகைய பெருமை மிகுந்த நகரத்தாா் சமுதாயத்தின் வீழ்ச்சிக்கு திராவிடம்தான் காரணம். திராவிட இயக்கத்தின் வளா்ச்சியால், தமிழகத்தில் ஆன்மிகம் மீதான பற்று குறையத் தொடங்கியது. இதனால் நகரத்தாா் சமுதாயம் வீழ்ச்சியடைந்து விட்டது என்றாா் அவா்.
