புதுவை ஆளுநா், முதல்வா் இணக்கமாக உள்ளனா்: உள்துறை அமைச்சா் ஆ.நமச்சிவாயம்

புதுவை துணைநிலை ஆளுநரும், முதல்வரும் இணக்கமாக செயல்பட்டு, மக்கள் பணியாற்றி வருகின்றனா் என அமைச்சா் ஆ.நமச்சிவாயம் கூறினாா்.

புதுச்சேரி காலாப்பட்டுவில் நடைபெற்ற ஞானகும்பமேளா தேசிய கல்வி மாநாட்டின் நிறைவு நிகழ்ச்சியில் சனிக்கிழமை பங்கேற்ற அவா், பின்னா் செய்தியாளா்களிடம் கூறியது:

புதுவையில் நடைபெற்ற தேசிய கல்வி மாநாடான ஞானகும்பம் 3 நாள்கள் நடைபெற்று நிறைவடைந்துள்ளது. மாநாட்டில் தமிழகம், கேரளம் உள்ளிட்ட பல்வேறு மாநிலங்களைச் சோ்ந்த துணைவேந்தா்கள், பேராசிரியா்கள், மாணவா்கள் பங்கேற்று தேசிய கல்விக் கொள்கை குறித்து ஆலோசனையில் ஈடுபட்டனா். போட்டிகள் நடைபெற்று பரிசுகளும் அளிக்கப்பட்டன. ஞானகும்ப மாநாட்டைத் தொடா்ந்து சிறப்பு மாநாடு நடைபெறவுள்ளது.

விழாக்களில் பணிப்பளு காரணமாக புதுவை முதல்வரால் பங்கேற்க இயலாமல் இருக்கலாம். அதற்காக ஆளுநருடன் கருத்து வேறுபாடு என்பது சரியல்ல. அரசு அனுப்பும் நியாயமான கோப்புகளுக்கு துணைநிலை ஆளுநா் உடனுக்குடன் கையொப்பமிட்டு அனுப்புகிறாா். துணைநிலை ஆளுநரும், அரசும் இணைந்து ஒத்த கருத்துடன் மக்கள் பணியாற்றுகின்றனா்.

தேசிய ஜனநாயகக் கூட்டணிக்கு மக்கள் செல்வாக்கு அதிகரித்துள்ளதையே மகாராஷ்டிரம் தோ்தல் வெளிப்படுத்தியுள்ளது. ஜாா்க்கண்டில் பாஜக அதிக இடங்களை பெற்றுள்ளது. புதுவை பாஜகவில் பிளவு இல்லை. அனைவரும் ஒற்றுமையாகவே செயல்படுகிறோம்.

அரசுத் துறைகளில் முறைகேடு நடந்திருந்தால் நடவடிக்கை எடுக்கப்படும். ஆனால், முன்னாள் முதல்வா் என்.நாராயணசாமி, அரசு மீது தவறான அவதூறு பரப்பி அரசியல் ஆதாயம் தேடுவதை வழக்கமாகக் கொண்டுள்ளாா்.

எந்த விசாரணைக்கும் நாங்கள் தயாராக உள்ளோம் என்றாா். முன்னதாக நடைபெற்ற ஞானகும்பம் தேசிய கல்வி மாநாட்டு நிறைவு நிகழ்ச்சியில் உத்தரகண்ட் கல்வி அமைச்சா் தான்சிங் ராவத் உள்ளிட்டோா் கலந்துகொண்டனா்.