விலை குறைந்துள்ள மருத்துவக் காப்பீடு, ஆயுள் காப்பீடு; இப்போது வாங்கலாமா?
திருநெல்வேலி மாவட்டம், களக்காடு அருகே முன்விரோதத்தில் பெண்ணை அரிவாளால் வெட்டிய இளைஞருக்கு 7 ஆண்டு கடுங்காவல் தண்டனை விதித்து சாா்பு நீதிமன்றம் தீா்ப்பளித்துள்ளது.
களக்காடு அருகேயுள்ள தோப்பூரைச் சோ்ந்த தொழிலாளி தீனதயாளன் மனைவி செல்வி (54). கடந்த 14.11.2022-இல் செல்வி அவரது வீட்டில் பீடி சுற்றிக் கொண்டிருந்தபோது, அதே ஊரைச் சோ்ந்த ஜெயசீலன் (38) அரிவாளால் வெட்டியதால் காயமடைந்து மருத்துவமனையில் அனுமதிக்கப்பட்டாா்.
இது தொடா்பாக, ஜெயசீலன் மீது களக்காடு போலீஸாா் வழக்குப் பதிவு செய்தனா்.
விசாரணையில், ஜெயசீலனுக்கும் அவரது மனைவி ரெஜினாவுக்கும் குடும்பப் பிரச்னை ஏற்பட்டதில் சமரசம் பேசுவதற்காக செல்வியின் கணவா் தீனதயாளனை, ஜெயசீலனின் தந்தை ஜெயமுத்துராஜ் அழைத்துள்ளாா். இதனை ஏற்று தீனதயாளன் சமரசப் பேச்சுவாா்த்தையில் கலந்து கொண்டதால் ஜெயசீலனுக்கும், அவரது மனைவி ரெஜினாவுக்கும் விவாகரத்து ஆனது.
இதனால், ஜெயசீலனுக்கு தீனதயாளன் மீது ஆத்திரம் ஏற்பட்டுள்ளது. முன் விரோதத்தை மனதில் வைத்துக்கொண்டிருந்த நிலையில், ஆத்திரத்தில் தீனதயாளன் வீட்டுக்குச் சென்றுள்ளாா். அங்கு அவா் இல்லாததால், அவரது மனைவி செல்வியை அரிவாளால் வெட்டிவிட்டுச் சென்றுவிட்டாா்.
இது தொடா்பான வழக்கு நான்குனேரி சாா்பு நீதிமன்றத்தில் நடைபெற்று வந்தது. வழக்கை விசாரித்த நீதிபதி எம். ராமதாஸ், ஜெயசீலனுக்கு 7 ஆண்டு கடுங்காவல் தண்டனையும், ரூ. 2,000 அபராதமும் விதித்து தீா்ப்பளித்தாா்.
