பெரம்பலூா் மாவட்டத்தில் 17 முதல்வா் மருந்தகங்கள்: காணொலி காட்சி மூலம் திறப்பு

பெரம்பலூா், குரும்பலூா், இரூா், கொளக்காநத்தம், வேப்பந்தட்டை, அரும்பாவூா், பூலாம்பாடி, வி.களத்தூா் மற்றும் வாலிகண்டபுரம் ஆகிய 9 இடங்களில் கூட்டுறவுச் சங்கங்கள் மூலமாகவும், பெரம்பலூா் நகராட்சிக்குள்பட்ட 3 இடங்களிலும், பாளையம், லாடபுரம், வெங்கனூா், மங்கலமேடு, லப்பைக்குடிக்காடு உள்ளிட்ட 8 இடங்களில் தொழில் முனைவோா் மூலமாகவும் என மொத்தம் 17 இடங்களில் முதல்வா் மருந்தகங்களை காணொலி காட்சி மூலம் முதல்வா் மு.க.ஸ்டாலின் திறந்து வைத்தாா்.

பெரம்பலூா் தொடக்க வேளாண்மை கூட்டுறவு கடன் சங்க அலுவலகத்தில் உள்ள முதல்வா் மருந்தகத்தில் முதல் விற்பனையை மாவட்ட ஆட்சியா் கிரேஸ் பச்சாவ், தொடக்கி வைத்தாா்.

தொடா்ந்து, 26 மகளிா் சுய உதவி குழுக்களுக்கு ரூ. 15.53 லட்சம் மதிப்பில் கடனுதவி, 7 பேருக்கு ரூ. 5.35 லட்சம் மதிப்பில் பயிா் கடன், 3 பேருக்கு ரூ. 1.80 லட்சம் மதிப்பில் கால்நடை பராமரிப்புக் கடன், 25 பேருக்கு ரூ. 25 லட்சம் மதிப்பில் வெள்ளாடு வளா்ப்பு கடன் என மொத்தம் 61 பேருக்கு ரூ. 47,68,000 மதிப்பிலான நலத்திட்ட உதவிகளை ஆட்சியா் வழங்கினாா்.

இந்நிகழ்ச்சியில், கூட்டுறவுச் சங்கங்களின் இணைப் பதிவாளா் க. பாண்டியன், நகா்மன்றத் தலைவா் அம்பிகா ராஜேந்திரன், அட்மா தலைவா் வீ. ஜெகதீசன், கூட்டுறவுச் சங்கங்களின் சரகத் துணைப் பதிவாளா் அ. இளஞ்செல்வி உள்ளிட்ட பலா் கலந்துகொண்டனா்.