‘பெற்றோரைக் கொண்டாடுவோம்’ மாநாடு: முன்னேற்பாடுகளை அமைச்சா்கள் ஆய்வு!

கடலூா் மாவட்டம், வேப்பூா் வட்டம், திருப்பெயா் கிராமத்தில் பெற்றோா் ஆசிரியா் கழகம் சாா்பில் நடைபெற உள்ள ‘பெற்றோரைக் கொண்டாடுவோம்’ மண்டல மாநாட்டின் முன்னேற்பாடுகளை பள்ளிக் கல்வித்துறை அமைச்சா் அன்பில் மகேஸ் பொய்யாமொழி, தொழிலாளா் நலன், திறன் மேம்பாட்டுத்துறை அமைச்சா் சி.வெ.கணேசன் ஆகியோா் செவ்வாய்க்கிழமை பாா்வையிட்டனா்.

தமிழக முதல்வா் மு.க.ஸ்டாலின் வழிகாட்டுதலின்பேரில், மாணவா்கள், ஆசிரியா்கள் மற்றும் பெற்றோா்கள் நலனை மேம்படுத்தி விழிப்புணா்வு ஏற்படுத்தும் வகையில், தமிழ்நாடு பெற்றோா் ஆசிரியா் கழகத் தலைவா், பள்ளிக் கல்வித் துறை அமைச்சா் ஆகியோரால் ‘பெற்றோரைக் கொண்டாடுவோம்’ என்ற சிறப்பு நிகழ்ச்சி ஏற்படுத்தப்பட்டது. இந்த நிகழ்ச்சி ஆறு மண்டலங்களில் சிறப்பாக நடைபெற்றது. தற்போது, ஏழாவது மண்டல மாநாடாக கடலூா் மாவட்டத்தில் திருப்பெயா் கிராமத்தில் பிப்.22-ஆம் தேதி நடைபெற உள்ளது.

கடலூா், விழுப்புரம், கள்ளக்குறிச்சி, மயிலாடுதுறை, அரியலூா், பெரம்பலூா் மற்றும் திருவண்ணாமலை ஆகிய ஏழு மாவட்டங்களை ஒருங்கிணைத்து கடலூா் மண்டல பெற்றோா் ஆசிரியா் கழக மாநாடு நடைபெற உள்ளது. இதில், முதல்வா் மு.க.ஸ்டாலின் பங்கேற்கவுள்ளாா்.

மாநாட்டில் வாகனங்களை நிறுத்த ஏற்பாடு செய்வது, இருக்கைகள், குடிநீா், கழிப்பறை மற்றும் பாதுகாப்பு உள்ளிட்ட அடிப்படை வசதிகள் குறித்து அமைச்சா்கள் ஆய்வு செய்து பல்வேறு துறை சாா்ந்த அலுவலா்களுடன் முன்னேற்பாடு பணிகள் குறித்து ஆலோசனை மேற்கொண்டனா்.

ஆய்வின்போது, ஆட்சியா் சிபி ஆதித்யா செந்தில்குமாா், விருத்தாசலம் எம்எல்ஏ எம்.ஆா்.ஆா்.ராதாகிருஷ்ணன், மாவட்ட ஊரக வளா்ச்சி முகமை கூடுதல் ஆட்சியா் ரா.சரண்யா, முதன்மைக் கல்வி அலுவலா் எல்லப்பன், விருத்தாசலம் வருவாய்க் கோட்டாட்சியா் சையத் மெஹ்முத், உதவி இயக்குநா் (ஊராட்சிகள்) முருகன் உள்ளிட்டோா் உடனிருந்தனா்.