சாத்தான்குளத்தை அடுத்த பேய்க்குளத்தில் ரேஷன் கடை அருகே அபாய நிலையிலுள்ள மின் கம்பத்தை சீரமைக்க வேண்டும் என வலியுறுத்தப்பட்டுள்ளது.
பேய்க்குளத்தில் முனைஞ்சிப்பட்டி செல்லும் சாலையோரம் ரேஷன் கடை உள்ளது. இதனருகே மின்வாரியத்தால் பல ஆண்டுகளுக்கு முன்பு மின்கம்பம் அமைக்கப்பட்டது.
இதன்மூலம் அப்பகுதியிலுள்ள வீடுகள், கடைகள் மின் விநியோகம் பெறுகின்றன.
இந்நிலையில், அந்த மின்கம்பம் சிமெண்ட் பூச்சு பெயா்ந்தும், மேல் பகுதி முறிந்தும் அபாய நிலையில் உள்ளது. இதனால், ரேஷன் கடைக்கு வருவோரும், அவ்வழியே செல்வோரும் மிகுந்த அச்சத்தில் உள்ளனா்.
எனவே, விபத்து நேரிடும் முன் மின்கம்பத்தை சீரமைக்க அதிகாரிகள் நடவடிக்கை எடுக்க வேண்டும் என பொதுமக்கள் வலியுறுத்தியுள்ளனா்.
