‘பொறியியல் பயிலும் மாணவா்கள் தொழிற்சாலைகளை பாா்வையிடுவது அவசியம்’

பொறியியல் பயிலும் மாணவா்கள், படித்துக் கொண்டிருக்கும்போதே தொழிற்சாலைகளை பாா்வையிட்டு, அவற்றின் செயல்பாடுகளையும் அறிந்து கொள்ள வேண்டும் என சென்னை அண்ணா பல்கலை.யின் இயக்குநா் பி.ஹரிஹரன் கூறினாா்.

காஞ்சிபுரம் பொன்னேரிக்கரையில் உள்ள அண்ணா பல்கலை.யின் உறுப்புக் கல்லூரியில் பொறியியல் பயிலும் மாணவா்களுக்கு ஒருங்கிணைந்த பயிற்சித் திட்டம் தொடக்க விழா நடைபெற்றது. விழாவுக்கு தமிழ்நாடு திறன் மேம்பாட்டுக் கழகத் தலைமை நிா்வாக அதிகாரி எம்.ஜெயப்பிரகாஷ் தலைமை வகித்து, குத்து விளக்கேற்றி தொடங்கி வைத்தாா்.

பின்னா், அவா் பேசுகையில், அரசு கல்லூரிகளில் பயிலும் மாணவா்களுக்கு நான் முதல்வன் திட்டம் செயல் படுத்தப்பட்டு வருகிறது. இத்திட்டம் மாணவா்களின் தொழில்நுட்ப திறன்களை மேம்படுத்தி வேலைவாய்ப்புகளை அதிகரிக்க பெரிதும் உதவுகிறது என்றாா்.

விழாவிற்கு ஹெச்.எல்.மான்டோ ஆனந்த் பிரைவேட் லிமிடெட் நிறுவனத்தின் இணை நிா்வாக இயக்குநா் முன்னிலை வகித்தாா்.

இத்திட்டத்தில் மாணவா்களுக்கு கல்விக் கட்டணம், உணவு, போக்குவரத்து வசதி, இருப்பிடம் ஆகிய அனைத்தையும் தமது நிறுவனமே ஏற்றுக் கொள்வதாகத் தெரிவித்தாா்.

விழாவில் கலந்து கொண்டு சிறப்புரை நிகழ்த்திய சென்னை அண்ணா பல்கலை.யின் இயக்குநா் பி.ஹரிஹரன் பேசுகையில், பொறியியல் கல்லூரிகளில் பயிலும் மாணவா்கள் தொழிற்சாலைகளை பாா்வையிட்டு அவற்றின் செயல்பாடுகளை அறிந்து கொள்ள வேண்டியது அவசியம் என்றாா். மேலும், ஒருங்கிணைந்த பயிற்சித் திட்டத்தின் நன்மைகளையும் அவா் விரிவாக விளக்கிப் பேசினாா்.

அண்ணா பல்கலை.யின் உறுப்புக் கல்லூரி முதல்வா் வி.கவிதா வரவேற்றாா்.

விழாவில் ஹெச்எல் மான்டோ நிறுவனத்தின் மனித வள மேம்பாட்டு அதிகாரிகள், பொறியியல் கல்லூரிப் பேராசிரியா்கள் எம்.துரையரசன், ஜி.அருண் விஜய் உள்ளிட்டோா் கலந்து கொண்டனா்.