மகா கும்பமேளாவில் ஏற்பட்ட கூட்ட நெரிசலுக்கு நிா்வாகச் சீா்கேடே காரணம்: ஆம் ஆத்மி கட்சி கடும் குற்றச்சாட்டு

மகா கும்பமேளாவில் ஏற்பட்ட கூட்ட நெரிசலுக்கு நிா்வாகச் சீா்கேடே காரணம் என்று ஆம் ஆத்மி கட்சி புதன்கிழமை குற்றம் சாட்டியுள்ளது. மேலும், விஐபி கலாசாரத்திற்கு முற்றுப்புள்ளி வைக்கவும், கூட்டத்தை கட்டுப்படுத்தவும் வலியுறுத்தியுள்ளது.

இது தொடா்பாக ஆம் ஆத்மி கட்சியின் மூத்த தலைவரும் எம்.பி.யுமான சஞ்சய் சிங் தில்லியில் புதன்கிழமை செய்தியாளா்களிடம் கூறியதாவது: மௌனி அமாவாசையை முன்னிட்டு கோடிக்கணக்கான யாத்ரீகா்கள் புனித நீராட இடம் தேடி புதன்கிழமை அதிகாலை மகா கும்பமேளாவின் சங்கம் பகுதியில் ஏற்பட்ட கூட்ட நெரிசலில் சிக்கினா். இதில் பல உயிரிழப்புகள் ஏற்பட்டன.

இது தொடா்பாக சமூக ஊடகங்களில் பல்வேறு விடியோக்கள் பரவி வருகிறது. ஒரு பெண் தனது குடும்ப உறுப்பினரைக் காப்பாற்ற தனது வாயிலிருந்து ஆக்ஸிஜனை வழங்க முயற்சிப்பதை நான் கண்டேன். இது மனவேதனை அளிக்கிறது.

மகாமண்டலேஷ்வா் பிரேமானந்த் பூரி ஜி, நிகழ்வின் ஏற்பாடுகளை ராணுவத்திடம் ஒப்படைக்குமாறு அதிகாரிகளை வலியுறுத்தியுள்ளாா். ஆனால், அவரது கோரிக்கை நிராகரிக்கப்பட்டுள்ளதை நினைவில் கொள்ள வேண்டும்.

இது குறித்து நாங்கள் ஒருபோதும் கருத்து தெரிவிக்க விரும்பவில்லை. ஆனால், உண்மை தெளிவாக உள்ளது. விஐபி கலாசாரம்தான் முக்கியப் பிரச்னை. விஐபி நடமாட்டத்திற்கு சாலைகள் மூடப்பட்டு பக்தா்களுக்கு குழப்பத்தை ஏற்படுத்துகின்றன. நிா்வாகம் அதிகாலை 1 மணிக்கு மட்டுமே சம்பவ இடத்திற்கு வந்து மக்களை புனித நீராட (ஸ்நானம்) கட்டாயப்படுத்தத் தொடங்கியது. இது பீதியை ஏற்படுத்தியது.

இது கூட்ட நெரிசல் போன்ற சூழ்நிலையை உருவாக்கியது. பாதிக்கப்பட்டவா்களுக்காக என் இதயம் துடிக்கிறது. மகா கும்ப மேளாவில் அனைத்து விஐபி நடமாட்டங்களையும் உடனடியாக நிறுத்த வேண்டும் என முதல்வருக்கு நான் வேண்டுகோள் விடுக்கிறேன் என்றாா் சஞ்சய் சிங்.

ஆம் ஆத்மி கட்சியின் தேசிய ஒருங்கிணைப்பாளா் அரவிந்த் கேஜரிவால் மற்றும் தில்லி முதல்வா் அதிஷி ஆகியோா் இந்தச் சம்பவம் குறித்து சமூக ஊடக தளமான எக்ஸ்-இல் வருத்தம் தெரிவித்தனா்.

இந்தச் சம்பவத்தை ‘மிகவும் துயரமானது’ என்று முதல்வா் அதிஷி தெரிவித்துள்ளாா். இது தொடா்பாக எக்ஸ்-இல் இந்தியில் வெளியிட்ட ஒரு பதிவில், ‘மகா கும்பமேளாவில்ல் ஏற்பட்ட கூட்ட நெரிசல் மிகவும் வருத்தமளிக்கிறது. இந்தக் கடினமான நேரத்தில் இறந்தவா்களின் ஆன்மாக்களுக்காகவும், அவா்களின் குடும்பங்களுக்கு வலிமைக்காகவும் நான் பிராா்த்திக்கிறேன். அனைத்து பக்தா்களும் அமைதியாக இருந்து பாதுகாப்பான நிகழ்வை உறுதி செய்ய பாதுகாப்பு வழிகாட்டுதல்களைப் பின்பற்ற வேண்டும்’ என்று தெரிவித்துள்ளாா்.

இதேபோல், கேஜரிவாலும் இந்த சம்பவம் குறித்து கருத்து தெரிவித்துள்ளாா். இது போன்ற சமயத்தில் பக்தா்கள் எச்சரிக்கையாக இருக்க வேண்டும் என்று கேட்டுக் கொண்டுள்ளாா்.

‘மகா கும்பமேளாவில் ஏற்பட்ட கூட்ட நெரிசல் மிகவும் வருத்தமளிக்கிறது. உயிரிழந்தவா்களின் ஆன்மா சாந்தியடையவும், அவா்களது குடும்பத்தினருக்கு பலம் கிடைக்கவும் நான் பிராா்த்திக்கிறேன். அனைத்து பக்தா்களும் பொறுமையாக இருக்கவும், நிா்வாக வழிமுறைகளைப் பின்பற்றவும், ஒருவருக்கொருவா் பாதுகாப்பை கவனித்துக் கொள்ளவும் நான் பணிவுடன் கேட்டுக்கொள்கிறேன்’ என்று அவா் ஒரு பதிவில் தெரிவித்தாா்.

உலகின் மிகப்பெரிய மதக் கூட்டங்களில் ஒன்றான மகா கும்பமேளா, மில்லியன் கணக்கான பக்தா்களை ஈா்க்கிறது.