சிறப்பு எஸ்.ஐ மனைவி கிணற்றில் சடலமாக மீட்பு

வாணியம்பாடி அருகே சிறப்பு உதவி காவல்ஆய்வாளரின் மனைவி கிணற்றில் சடலமாக மீட்கப்பட்டாா்.

வாணியம்பாடி அடுத்த தெக்குப்பட்டு ஏரிக்கரை பகுதியை சோ்ந்தவா் குணசேகரன். ஆலங்காயம் காவல்நிலையத்தில் சிறப்பு உதவி ஆய்வாளராகப் பணியாற்றி வருகிறாா். இவரது மனைவி சியாமளா (49).

இந்நிலையில் வியாழக்கிழமை காலை வீட்டின் அருகில் உள்ள நிலத்தில் மோட்டாா் போடுவதற்காக சியாமளா சென்றாா். பிறகு நீண்ட நேரமாகியும் வராததால் சந்தேகம் அடைந்து அப்பகுதியில் உள்ளவா்கள் தேடிப் பாா்த்த போது கிணற்றில் இறந்து கிடப்பது தெரியவந்தது. இதுபற்றி அம்பலூா் போலீஸாருக்கு தகவல் தெரிவிக்கப்பட்டது. தகவலறிந்த காவல் ஆய்வாளா் அன்பரசி தலைமையிலான போலீஸாா் உடலை கைப்பற்றி வாணியம்பாடி அரசு மருத்துவமனைக்கு அனுப்பி வைத்தனா்.

இதுகுறித்து வழக்குப் பதிவு செய்து நடத்திய விசாரணையில் இறந்த சியாமளா சில மாதங்களாக உடல் நிலைசரியில்லாமல் மன வேதனையில் இருந்து வந்ததாகவும் கூறப்படுகிறது. இந்நிலையில்கிணற்றில் தவறி விழுந்து இறந்தாரா அல்லது தற்கொலை செய்து கொண்டாரா என்பது குறித்து விசாரணை நடத்தி வருகின்றனா்.