தில்லியில் இரட்டை என்ஜின் அரசை அமைப்போம்: பாஜக

பிரதமா் நரேந்திர மோடி தலைமையில் தில்லியில் இரட்டை என்ஜின் அரசை அமைப்போம் என்று பாஜக வியாழக்கிழமை கூறியுள்ளது.

மேலும், ஆளும் ஆம் ஆத்மி கட்சி மற்றும் அதன் தேசிய ஒருங்கிணைப்பாளா் அரவிந்த் கேஜரிவால் மீது மக்கள் ‘கோபத்தில்‘ இருப்பதாகவும் அக்கட்சி கூறியது.

தில்லியில் புதன்கிழமை சட்டப்பேரவைத் தோ்தல் நடைபெற்றது. சுமாா் 60.54 சதவீதம் வாக்குகள் பதிவாகியதாக தில்லி தோ்தல் அலுவலகத்தின் தகவல்கள் தெரிவிக்கின்றன.

இதைத் தொடா்ந்து, புதன்கிழமை தோ்தல்களுக்குப் பிந்தைய பல்வேறு கருத்துக் கணிப்புகள் தில்லி சட்டப்பேரவைத் தோ்தலில் ஆளும் ஆம் ஆத்மி கட்சியை விட பாஜக அதிக தொகுதிகளில் வெற்றி பெறும் என்று தெரிவிக்கின்றன. ஆனால், காங்கிரஸ் குறிப்பிடத்தக்க வெற்றிகளைப் பெறாது என்று கணிக்கப்பட்டுள்ளது.

இருப்பினும், தோ்தலுக்கு பிந்தைய இரண்டு கருத்துக்கணிப்புகள் ஆம் ஆத்மி கட்சிக்கு வெற்றி கிடைக்கும் என்று தெரிவித்துள்ளன. மேலும், பல்வேறு தொகுதிகளில் ஆம் ஆத்மி கட்சிக்கும், பாஜகவுக்கும் நெருக்கமான போட்டி இருக்கும் என்றும் தெரிவித்துள்ளன.

இந்நிலையில், தோ்தல்களுக்குப் பிந்தைய கருத்துக் கணிப்புகளை ஆம் ஆத்மி கட்சி முழுமையாக நிராகரித்தது. கருத்துக்கணிப்புகள் ‘வரலாற்று ரீதியாக’ அதன் செயல்திறனை குறைத்து மதிப்பிட்டுள்ளதாகக் கூறியது. அதே நேரத்தில் பாஜக இந்த கணிப்புகளை மக்களின் மாற்றத்திற்கான அறிகுறி என்று கூறியுள்ளது.

இதற்கிடையே, நாடாளுமன்ற வளாகத்தில் வியாழக்கிழமை பிடிஐ செய்தி நிறுவனத்திடம் பாஜகவின் தேசிய பொதுச் செயலாளா் அருண்சிங் கூறுகையில், ‘ஆம் ஆத்மி கட்சி மற்றும் அரவிந்த் கேஜரிவால் மீது மக்கள் மத்தியில் எவ்வளவு கோபம் உள்ளது என்பதை நாங்கள் பாா்த்தோம். மக்களுக்கு பாஜக மீது நம்பிக்கை உள்ளது. பிரதமா் நரேந்திர மோடி தலைமையில் தில்லியில் இரட்டை என்ஜின் அரசை அமைக்க அவா்கள் விரும்புகிறாா்கள்‘ என்றாா்.

அவா் மேலும் கூறுகையில், ‘அதனால்தான் பிரதமா் மோடியின் தலைமையில் தில்லியில் இரட்டை என்ஜின் அரசை அமைக்கப் போகிறோம் என்று நான் முழுமையாக நம்புகிறேன். இது தில்லியின் முழுமையான வளா்ச்சியை உறுதி செய்யும்’ என்றாா்.

உத்தர பிரதேசத்தின் மில்கிபூா் சட்டப்பேரவைத் தொகுதி இடைத்தோ்தலில் முறைகேடுகள் நடந்ததாகவும், தோ்தல் ஆணையம் ‘பாரபட்சமாக‘ நடந்து கொண்டதாகவும் சமாஜ்வாதி கட்சி குற்றம் சாட்டியதைப் பற்றி கேட்டதற்கு, அருண் சிங் பதிலடி கொடுத்தாா்.

இது குறித்து அருண் சிங் கூகையில், ‘சமாஜ்வாதி கட்சியின் தலைவா் அகிலேஷ் யாதவ் எப்போதும் இதுபோன்ற ‘எதிா்மறையான‘ விஷயங்களைப் பேசுகிறாா். அதனால்தான் மாநில மக்கள் அவரை மீண்டும் மீண்டும் நிராகரித்து வருகின்றனா்’‘ என்றாா்.

இதற்கிடையே, மில்கிபூரில் நடந்த சட்டப்பேரவைத் தொகுதி இடைத்தோ்தலின் போது தோ்தல் குழுவின் பாரபட்சமான செயல்களுக்கு எதிா்ப்புத் தெரிவிக்கும் வகையில், வியாழக்கிழமை மக்களவையில் சமாஜ்வாதி கட்சி உறுப்பினா்கள் ‘தோ்தல் ஆணையம்’ பொறிக்கப்பட்ட வெள்ளைத் தாளைப் பிடித்துக் கொண்டிருந்தனா்.

கட்சித் தலைவா் அகிலேஷ் யாதவ் நாடாளுமன்ற வளாகத்தில் செய்தியாளா்களிடம் கூறுகையில், ‘தோ்தல் ஆணையம் ‘இறந்துவிட்டதால்’ தோ்தல் ஆணையத்தை மறைக்க ஒரு துணியைக் கொண்டு வந்திருக்க வேண்டும்’ என்று கூறினாா்.

மேலும், அவா் கூறுகையில், ‘அயோத்தியில் மூத்த காவல் கண்காணிப்பாளா் முதல் இளைய அதிகாரிகள் வரை சமாஜ்வாதி கட்சி உறுப்பினா்களை குறிவைத்து மிரட்டினா். தோ்தல் ஆணையம் சுதந்திரமான மற்றும் நியாயமான இடைத்தோ்தலை உறுதி செய்யவில்லை. அந்த அதிகாரிகள் ஒரு குறிப்பிட்ட சாதியைச் சோ்ந்தவா்கள்ஆவா். தோ்தல் ஆணையம் கடுமையான நடவடிக்கை எடுத்திருந்தால், இடைத்தோ்தல் சுதந்திரமான மற்றும் நியாயமான முறையில் நடைபெற்றிருக்கும்’ என்றாா்.