கபில் சங்வான் எனப்படும் நந்து கும்பலுடன் மோதலில் ஈடுபட்ட மஞ்சித் மஹால் கும்பலின் முக்கிய உறுப்பினரை தில்லி காவல்துறையின் சிறப்புப் பிரிவு கைது செய்துள்ளதாக அதிகாரி ஒருவா் வியாழக்கிழமை தெரிவித்தாா்.
இது தொடா்பாக காவல் துறை துணை ஆணையா் (சிறப்பு பிரிவு) அமித் கௌசிக் கூறியதாவது:
நஃபே சிங் (45) உத்தர பிரதேசத்தின் மகாராஜ்கஞ்சில் உள்ள இந்திய-நேபாள எல்லையில் புதன்கிழமை கைது செய்யப்பட்டாா். மகாராஷ்டிர மாநிலத்தின் ஒழுங்கமைக்கப்பட்ட குற்றக் கட்டுப்பாட்டுச் சட்டம் (எம்சிஓசிஏ) கீழ் அவரின் தலைக்கு ரூ.50,000 வெகுமதி அறிவிப்பு இருப்பது குறிப்பிடத்தக்கது.
கொலை மற்றும் தாக்குதல் தொடா்பான 5 வழக்குகள் உள்பட 14 கொடூரமான வழக்குகளில் குற்றவாளியாக இவா் அறியப்படுகிறாா். சுனில் என்கிற மருத்துவா் கொலையில் கடந்த 2015-இல் இவா் ஈடுபட்டுள்ளாா். இது அவா்களின் கும்பல்களுக்கு இடையே வன்முறை போட்டியைத் தூண்டி, நஜாஃப்கா் மற்றும் அதைச் சுற்றியுள்ள பகுதிகளில் பலரின் உயிரிழப்புக்கு காரணமானது.
முன்னதாக கைது செய்யப்பட்ட இவருக்கு கடந்த செப்டம்பா் 2023-இல் ஆறு நாள் இடைக்கால ஜாமீன் வழங்கப்பட்டது. ஆனால், அவா் பின்னா் சரணடையவில்லை. அதற்கு பதிலாக தலைமறைவானாா். தப்பிக்கும் போது, அவா் தனது குடும்பத்தினருடனான அனைத்து உறவுகளையும் துண்டித்துக் கொண்டு, ஹரித்வாா் போன்ற இடங்களுக்கும், காத்மாண்டு, நவல்பராசி மற்றும் பைரஹாவா உள்ளிட்ட நேபாளத்தின் பல்வேறு இடங்களுக்கும் சென்றாா். கைது நடவடிக்கையில் இருந்து தப்பித்த போதிலும், நஃபே சிங் தனது கும்பலை தொடா்ந்து வழி நடத்தி வந்துள்ளாா்.
ராஜஸ்தான், ஹரியாணா மற்றும் தில்லியில் அதிகாரிகள் பல தேடுதல் நடவடிக்கைகளை மேற்கொண்டனா். இருப்பினும், அவரைக் கண்டுபிடிப்பது சவாலாக இருந்தது. தொடா்ச்சியான கண்காணிப்பு இறுதியில் இந்தியா-நேபாள எல்லையில் அவரது கைது நடவடிக்கையில் முடிவடைந்துள்ளது. நஃபே சிங்கின் கைது அதிகாரிகளுக்கு ஒரு குறிப்பிடத்தக்க திருப்புமுனையாகும். அவரைப் பிடிக்க மேற்கொள்ளப்பட்ட விரிவான முயற்சிகள் ஒழுங்கமைக்கப்பட்ட குற்றங்களைக் கையாள்வதில் உள்ள சவால்களை எடுத்துக்காட்டுகின்றன என காவல் துறை அதிகாரி தெரிவித்தாா்.
