மணப்பாறை பால் உற்பத்தியாளா்கள் சங்க அங்கத்தினா்களுக்கு ரூ.1.62 கோடி போனஸ்!

திருச்சி மாவட்டம், மணப்பாறை பால் உற்பத்தியாளா்கள் கூட்டுறவுச் சங்கம், தனது அங்கத்தினா்களுக்கு ரூ. 1.62 கோடி போனஸ் வழங்கியுள்ளது.

மணப்பாறை பால் உற்பத்தியாளா்கள் கூட்டுறவு சங்கம் லிட்(ஆா்.985)-ன் 74-ஆவது பேரவைக் கூட்டம் மணப்பாறைப்பட்டியில் சனிக்கிழமை நடைபெற்றது. சங்கத்தின் செயலா் ஆா். தங்கவேல், முதுநிலை ஆய்வாளா் - செயலாட்சியா் மு.ரா. பாண்டுரங்கன் ஆகியோா் தலைமையில் நடைபெற்ற கூட்டத்தில், பால் உற்பத்தியாளா்கள் சங்கத் தலைவா்கள் என். கந்தசாமி, எஸ். சேசுரத்தினம், பால் உற்பத்தியாளா்கள் சங்கப் பணியாளா்கள் சங்க மாநிலத் தலைவா் த. சிவஞானம், முன்னாள் சங்கத் தலைவா்கள் ஏ. சோபியாஎலிசபெத், ஸ்டெல்லாமேரி, விரிவாக்க அலுவலா் சசிகலாதேவி ஆகியோா் முன்னிலை வகித்தனா்.

சிறப்பு அழைப்பாளராக கூட்டுறவுத் துறை துணைப் பதிவாளா் ஜி. நாகராஜ்சிவக்குமாா் பங்கேற்றாா். 2023 - 2024 ஆண்டுக்காக நிா்வாக அறிக்கையை செயலா் ஆா். தங்கவேல் வாசித்தாா். அதில் 1950-ஆம் ஆண்டில் தொடங்கி செயலாற்றி வரும் மணப்பாறை பால் உற்பத்தியாளா்கள் கூட்டுறவு சங்கம் லிட்(ஆா்.985), தமிழ்நாட்டில் பால் உற்பத்தியில் 2-ஆவது இடத்தில் அங்கம் வகிப்பதாகவும், பால் கொள்முதல் விலையில் லிட்டருக்கு ரூ.38.62 அளித்து முதன்மை வகிக்கும் சங்கம் என்றும், தற்போது 8199 அங்கத்தினா்களைக் கொண்டு நாள் ஒன்றுக்கு சுமாா் 25 ஆயிரம் லிட்டா் பால் உற்பத்தி செய்வதாகவும், டீ, காபி, பூஸ்ட், பால்பேடா மற்றும் ஆவின் நெய் மற்றும் ஐஸ்கிரீம் ஆகியவை மூலம் ரூ. 1,78,56,592.50-க்கு விற்பனை நடைபெறுவதாகவும், சங்க லாபத்திலிருந்து போனஸ் மற்றும் அங்கத்தினரின் பங்குத் தொகையில் 14 சதவீத டிவிடெண்ட் என ரூ. 1,61,73,675.60-ஐ வழங்கியுள்ளதாகவும், அவை இதே நாளில் அங்கத்தினரின் வங்கிக் கணக்குகளில் வரவு வைக்கப்படுவதாகவும் தெரிவித்தாா்.

நிகழ்ச்சியில் அதிக பால் உற்பத்தி செய்து அளித்த முதல் 3 அங்கத்தினருக்கு சிறப்புப் பரிசுகள் வழங்கப்பட்டன. இதில் 45.6 ஆயிரம் லிட்டா் பால் உற்பத்தி செய்து, ரூ. 96.7 ஆயிரம் போனஸ் பெற்று முதலிடம் பிடித்த பொத்தமேட்டுப்பட்டி பி. சகாயசாந்திக்கு ஒரு கிராம் தங்க நாணயம், 29.4 ஆயிரம் லிட்டா் பால் உற்பத்தி செய்து ரூ. 62.3 ஆயிரம் போனஸ் பெற்று இரண்டாம் இடத்தைப் பெற்ற மணப்பாறைப்பட்டி பி. இளமுருகனுக்கு ரிமோட் மின் விசிறி, 19.3 ஆயிரம் லிட்டா் பால் உற்பத்தி செய்து ரூ. 41 ஆயிரம் போனஸ் பெற்று மூன்றாம் இடம் பிடித்த இனாம்ரெட்டியப்பட்டி பி. ராமசாமிக்கு ஸ்டேண்டிங் மின் விசிறி ஆகியவை சிறப்பு பரிசுகளாக வழங்கப்பட்டன.