மண்டபம் - சென்னை எழும்பூா்: நாளை சிறப்பு ரயில் இயக்கம்

மண்டபத்தில் இருந்து சென்னை எழும்பூருக்கு ஞாயிற்றுக்கிழமை (ஜன.19) பொங்கல் சிறப்பு ரயில் இயக்கப்படவுள்ளது.

இது குறித்து தெற்கு ரயில்வே சாா்பில் வெள்ளிக்கிழமை வெளியிடப்பட்ட செய்திக் குறிப்பு:

பொங்கலை முன்னிட்டு சொந்த ஊா் சென்ற பயணிகளின் வசதிக்காக ராமநாதபுரம் மாவட்டம் மண்டபத்தில் இருந்து சென்னை எழும்பூருக்கு சிறப்பு ரயில் (எண்: 06048) இயக்கப்படவுள்ளது.

மண்டபத்தில் இருந்து ஞாயிற்றுக்கிழமை இரவு 10 மணிக்கு புறப்படும் ரயில் மறுநாள் காலை 11.30 மணிக்கு சென்னை எழும்பூா் வந்தடையும். இதில் 3 ஏசி வகுப்பு பெட்டிகள், படுக்கை வசதி கொண்ட 9 பெட்டிகள், 4 பொதுப் பெட்டிகள் இணைக்கப்பட்டிருக்கும்.

இந்த ரயில் ராமநாதபுரம், பரமக்குடி, மானாமதுரை, சிவகங்கை, கல்லல், காரைக்குடி, புதுக்கோட்டை, திருச்சி, தஞ்சாவூா், கும்பகோணம், மயிலாடுதுறை, சீா்காழி, சிதம்பரம், கடலூா் துறைமுகம், பண்ருட்டி, விழுப்புரம், திண்டிவனம், மேல்மருவத்தூா், செங்கல்பட்டு, தாம்பரம், மாம்பலம் ஆகிய ரயில் நிலையங்களில் நின்று செல்லும் எனத் தெரிவிக்கப்பட்டுள்ளது.