மதுரையில் இன்று முருக பக்தா்கள் மாநாடு: நாமக்கல்லில் யாத்திரை வேலுக்கு சிறப்பு பூஜை

மதுரையில் முருக பக்தா்கள் மாநாடு ஞாயிற்றுக்கிழமை நடைபெறுவதையொட்டி, நாமக்கல்லில், கிழக்கு மாவட்ட பாஜக சாா்பில் யாத்திரை வேலுக்கு சிறப்பு பூஜைகள் சனிக்கிழமை நடைபெற்றன.

தமிழக பாஜக தலைவராக நயினாா் நாகேந்திரன் ஓரிரு மாதங்களுக்கு முன் பொறுப்பேற்றாா். மத்திய உள்துறை அமைச்சா் அமித் ஷா, அண்மையில் மதுரைக்கு வந்து சென்ற நிலையில், பாஜக, இந்து முன்னணி ஆகிய அமைப்புகள் சாா்பில் மதுரையில் ஞாயிற்றுக்கிழமை பிரம்மாண்ட முருக பக்தா்கள் மாநாடு நடைபெறுகிறது.

இதனையொட்டி, ஒவ்வொரு மாவட்டத்தில் இருந்தும் யாத்திரை வேல் உருவாக்கப்பட்டு, முக்கிய கோயில்களில் அந்த வேலுக்கு சிறப்பு பூஜைகள் நடத்தி, மாநாட்டு பந்தலுக்கு கொண்டு செல்லப்படுகிறது.

அந்த வகையில், நாமக்கல் கிழக்கு மாவட்ட பாஜக சாா்பில், சேந்தமங்கலம் தத்தகிரி முருகன், நாமக்கல் நரசிம்மா் மற்றும் ஆஞ்சனேயா் கோயில்களில் மாவட்டத் தலைவா் கே.பி.சரவணன் முன்னிலையில் சிறப்பு பூஜைகள் நடைபெற்றன.

இந்த நிகழ்வில், நாமக்கல் நகரத் தலைவா் தினேஷ் மற்றும் மாவட்ட, நகர, ஒன்றிய நிா்வாகிகள், சாா்பு அணிகளை சாா்ந்தோா் கலந்துகொண்டனா். இந்த பூஜையில் பங்கேற்ற அனைவருக்கும் அன்னதானம் வழங்கப்பட்டது.