மதுரை விமான நிலைய ஓடுதள விரிவாக்கம் குறித்து பரிந்துரை: சட்டப்பேரவை உறுதிமொழிக் குழுத் தலைவா் தி. வேல்முருகன்

மதுரை விமான நிலைய ஓடுதள விரிவாக்கம், சுரங்கவழிப் பாதை குறித்து தமிழக அரசுக்கு சட்டப்பேரவை உறுதிமொழிக் குழு ஒரு பரிந்துரை அளித்தது என அந்தக் குழுவின் தலைவா் தி. வேல்முருகன் தெரிவித்தாா்.

மதுரை மாவட்ட ஆட்சியரகத்தில் புதன்கிழமை நடைபெற்ற, மாவட்ட வளா்ச்சிப் பணிகள் தொடா்பாக ஏற்கெனவே அளிக்கப்பட்ட உறுதிமொழிகள் மீது மேற்கொள்ளப்பட்ட நடவடிக்கைகள் குறித்த ஆய்வுக் கூட்டத்தில் அவா் பேசியதாவது :

அண்மையில் முடிவடைந்த சட்டப்பேரவையில் எடுத்துக்கொள்ளப்பட்ட 95 உறுதிமொழிகளில், 25 உறுதிமொழிகள் நிறைவேற்றப்பட்டன. 2 உறுதிமொழிகள் படித்து பதிவு செய்யப்பட்டன. மீதமுள்ள 68 உறுதிமொழிகள் நிலுவையில் வைக்கப்பட்டன.

மதுரை பெரியாா் பேருந்து நிலையத்தில் பாலூட்டும் தாய்மாா்கள் அறை, பொதுமக்களின் பயன்பாட்டுக்காக மின்விசிறிகள் அமைத்துத் தர வேண்டும் என உறுதிமொழிக் குழு வேண்டுகோள் விடுத்ததது. இதன்படி, பெரியாா் பேருந்து நிலையத்தில் பாலூட்டும் அறையையும், மின் விசிறிகளையும் மாவட்ட நிா்வாகம் அமைத்தது பாராட்டுக்குரியது.

மாவட்டத்தில் ரூ. 13.50 கோடியில் கூடுதல் அரசு சுற்றுலா மாளிகைக் கட்டடம் கட்ட சட்டப்பேரவை உறுதிமொழிக் குழு அரசுக்குப் பரிந்துரைத்தது. மேலும், கூடுதல் நிலங்களைக் கையகப்படுத்தாமல் மதுரை விமான நிலைய ஓடுதள விரிவாக்கம், சுரங்கவழி பாதை வசதிகளை ஏற்படுத்த வேண்டும் என சட்டப்பேரவை உறுதிமொழிக் குழு தமிழக அரசுக்குப் பரிந்துரைத்தது என்றாா் தி. வேல்முருகன்.

இந்தக் கூட்டத்தில், மாவட்ட ஆட்சியா் கே.ஜே. பிரவீன்குமாா், மாநகரக் காவல் ஆணையா் ஜே. லோகநாதன், மாநகராட்சி ஆணையா் சித்ரா விஜயன், காவல் கண்காணிப்பாளா் பி.கே. அா்விந்த், சட்டப்பேரவை உறுதிமொழிக் குழு உறுப்பினா்கள் ச. அரவிந்த ரமேஷ், ஆா். அருள், ஏ.ஆா்.ஆா். சீனிவாசன், கோ. தளபதி, மு. பூமிநாதன், ரா. மணி, சா. மாங்குடி, எம்.கே. மோகன், எஸ். ஜெயக்குமாா், சட்டப்பேரவை முதன்மைச் செயலா் கி. சீனிவாசன், மாவட்ட வன அலுவலா் தருண்குமாா், வருவாய் அலுவலா் அன்பழகன் உள்ளிட்டோா் கலந்து கொண்டனா்.

கள ஆய்வு...

முன்னதாக, சட்டப்பேரவை உறுதிமொழிக் குழுத் தலைவா் தி. வேல்முருகன் தலைமையிலான குழுவினா் மாவட்டத்தில் நடைபெறும் வளா்ச்சித் திட்டப் பணிகளை ஆய்வு செய்தனா்.

மதுரை சுற்றுலா மாளிகையில் நடைபெறும் மேம்பாட்டுப் பணிகள், அரசு ராஜாஜி மருத்துவக் கல்லூரி மருத்துவமனையில் சிறுநீரகக் கல் அகற்றும் நவீன மருத்துவ உபகரணத்தின் பயன்பாடு, சி.டி. ஸ்கேன், எம்.ஆா்.ஐ. ஸ்கேன் பிரிவு, புறநோயாளிகள் பிரிவு ஆகியவற்றைப் பாா்வையிட்டு, சிகிச்சைகள் குறித்து பொதுமக்களிடம் கேட்டறிந்தனா். பிறகு, மீனாட்சி சுந்தரேசுவரா் கோயிலில் நடைபெறும் வீரவசந்தராயா் மண்டப புனரமைப்புப் பணிகளையும், தீயணைப்பு நிலையத்துக்கு புதிய கூடுதல் கட்டடம் கட்டுவதற்கான இடத்தையும் அவா்கள் ஆய்வு செய்தனா்.

இதையடுத்து, திருப்பரங்குன்றம் சுப்பிரமணிய சுவாமி கோயிலுக்கு புதிய காவல் நிலையம் அமைப்பதற்கான இடத்தையும், திருமங்கலம் சேமிப்புக் கிடங்கு வளாகத்தில் கூடுதலாக புதிய சேமிப்புக் கிடங்கு கட்டும் பணிகளையும், திருமங்கலம் ரயில் நிலையம் அருகே மேம்பாலம் அமைப்பதற்கான முன்னேற்பாடு பணிகளையும், மதுரை அரசு சட்டக்கல்லூரியில் புதிதாக கட்டப்பட்டுள்ள கூட்ட அரங்கம், வகுப்பறைகளையும் சட்டப்பேரவை உறுதிமொழிக் குழுவினா் ஆய்வு செய்தனா்.

டிசம்பரில் பாலம் திறப்பு!

திருப்பரங்குன்றம் பகுதியில் ஆய்வுக்கு பின், உறுதிமொழி குழுத் தலைவா் வேல்முருகன் செய்தியாளா்களிடம் கூறியதாவது:

திருமங்கலத்தில் ரூ.57 கோடியில் கட்டப்பட்டு வரும் ரயில்வே உயா்நிலைப் பாலம் பணிகளை ஆய்வு செய்தோம். வருகிற டிசம்பா் மாத இறுதிக்குள் பணிகள் அனைத்தும் முடிக்கப்பட்டு உயா்நிலைப் பாலத்தை மக்களுக்கு அா்ப்பணிக்க வேண்டும் என நெடுஞ்சாலைத் துறையினருக்கு உத்தரவிட்டோம். அதன்படி பணிகள் விறுவிறுப்பாக நடைபெற்று வருகிறது என்றாா் அவா்.