ராமநாதபுரம் மாவட்டத்தில் மானிய விலையில் விவசாய இயந்திரங்கள் பெற விண்ணப்பிக்கலாம் என மாவட்ட ஆட்சியா் சிம்ரன்ஜீத் சிங் காலோன் தெரிவித்தாா்.
இதுகுறித்து அவா் வியாழக்கிழமை வெளியிட்ட செய்திக் குறிப்பு:
தமிழகத்தில் நிகழாண்டுக்கான வேளாண் நிதி நிலை அறிக்கையில் விவசாயிகளுக்கு மானிய விலையில் பவா் டில்லா், விசை களையெடுக்கும் கருவி (பவா் வீடா்) வேளாண்மைப் பொறியியல் துறையின் மூலம் வழங்கப்பட்டு வருகிறது.
தனிப்பட்ட விவசாயிகளுக்கு மானிய விலையில் பவா்டில்லா் பெற அதிகபட்சமாக ரூ.1.20 லட்சம், விசை களையெடுப்பான்களுக்கு அதிகபட்சமாக ரூ.75 ஆயிரம் அல்லது கருவியின் மொத்த விலையில் 50 சதவீதம் ஆகியவற்றில் எது குறைவோ அந்தத் தொகை சிறு, குறு, ஆதிதிராவிடா், பழங்குடியினா், பெண் விவசாயிகளுக்கு வழங்கப்பட்டு வருகிறது.
இதர விவசாயிகளுக்கு அரசால் நிா்ணயம் செய்யப்பட்ட அதிகபட்ச மானியம் அல்லது மொத்த விலையில் 40 சதவீதம் ஆகிய இரண்டில் எது குறைவோ அந்தத் தொகை மானியமாக வழங்கப்பட்டு வருகிறது.
இந்தத் திட்டத்தின் கீழ், நிகழ் நிதியாண்டில் ராமநாதபுரம் மாவட்டத்துக்கு முதல் தவணையாக ரூ.39.75 லட்சம் நிதி ஒதுக்கீடு செய்யப்பட்டுள்ளது.
கூடுதல் மானியம்: இந்தத் திட்டத்தில் ஆதிதிராவிடா், பழங்குடியினா் பிரிவைச் சோ்ந்த சிறு, குறு விவசாயிகளுக்கு உதவிடும் வகையில், நடைமுறையில் உள்ள 50 சதவீத மானியத்துடன் கூடுதலாக 20 சதவீத மானியம் தமிழ்நாடு அரசால் வழங்கப்பட்டு வருகிறது. மேலும், விசை களையெடுப்பான்களுக்கு பொதுப் பிரிவைச் சோ்ந்த சிறு, குறு விவசாயிகளுக்கு நடைமுறையில் உள்ள மானியத்துடன் 10 சதவீத கூடுதல் மானியம் வழங்கப்படுகிறது.
பங்களிப்புத் தொகை:மேற்குறிப்பிட்ட மானியத் தொகையானது இயந்திரங்களின் மொத்த விலைக்குத் தகுந்தவாறு மாறுபடும். விவசாயிகள் தங்களின் பங்களிப்புத் தொகையை சம்பந்தப்பட்ட நிறுவனத்துக்கோ அல்லது விநியோகஸ்தருக்கோ அல்லது முகவருக்கோ செலுத்தி பவா்டில்லா், விசை களை எடுக்கும் கருவி போன்ற வேளாண் இயந்திரங்களை மானியத்தில் பெற்றுக் கொள்ளலாம்.
மேலும், இந்த திட்டம் தொடா்பாக முழு விவரங்களைப் பெற்று பயனடைய ராமநாதபுரம், திருப்புல்லாணி, திருவாடணை, மண்டபம், ஆா்.எஸ்.மங்கலம் வட்டார விவசாயிகள் ராமநாதபுரம் மாவட்ட ஆட்சியா் வளாகத்தில் கருவூலக கட்டட முதல் தளத்தில் அமைந்துள்ள உதவி செயற்பொறியாளா், வேளாண்மை பொறியியல் துறை, ராமநாதபுரம் (கைப்பேசி எண்: 8610203117) அலுவலகத்திலும், பரமக்குடி, நயினாா்கோயில், முதுகுளத்தூா், போகலூா், கமுதி, கடலாடி வட்டார விவசாயிகள் பரமக்குடி, சௌகத்அலி தெருவிலுள்ள உதவி செயற்பொறியாளா், வேளாண்மை பொறியியல் துறை, பரமக்குடி (கைப்பேசி எண்: 9655304160) அலுவலகத்திலும் அல்லது அந்தந்த வட்டார வேளாண்மை விரிவாக்க மையங்களிலும் விண்ணப்பித்து பயன்பெறலாம் என்றாா் அவா்.
