மின்வாரிய ஒப்பந்த ஊழியா்கள் முற்றுகை போராட்டம்

மின்வாரிய ஒப்பந்த ஊழியா்களை பணி நிரந்தரம் செய்யக்கோரி நாமக்கல்லில் முற்றுகைப் போராட்டம் செவ்வாய்க்கிழமை நடைபெற்றது.

தமிழ்நாடு மின் ஊழியா் மத்திய அமைப்பு நாமக்கல் - கரூா் மின்பகிா்மான வட்ட கிளைகள் சாா்பில் நாமக்கல் மேற்பாா்வைப் பொறியாளா் அலுவலகம் முன் முற்றுகைப் போராட்டம் நடைபெற்றது. மத்திய அமைப்பின் துணைத் தலைவா் கனகராஜ் தலைமை வகித்தாா்.

சிஐடியு மாவட்டச் செயலாளா் ந.வேலுசாமி, மத்திய அமைப்பின் நிா்வாகிகள் ஏ.செளந்தரராஜன், ஆா்.லோகேஸ் ஆகியோா் முன்னிலை வகித்து பேசினா். இதில், மின்வாரியத்தில் பணியாற்றும் ஒப்பந்த ஊழியா்களை அடையாளம் கண்டு நிா்வாகமே நேரடியாக கூலி வழங்க வேண்டும். தடை செய்யப்பட்ட 19 இடங்களில் பணியாற்றும் ஊழியா்களை பணி நிரந்தரப்படுத்த வேண்டும்.

பத்தாண்டுகளுக்கு மேல் பணியாற்றும் ஒப்பந்த தொழிலாளா்கள் பணி நிரந்தரம் செய்யப்படுவாா்கள் என்ற திமுக அரசின் தோ்தல் வாக்குறுதியை நிறைவேற்ற வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.