மீஞ்சூரில் ரயில்வே மேம்பால பணிகளை திருவள்ளூா் எம்.பி சசிகாந்த் செந்தில் அதிகாரிகளுடன் புதன்கிழமை ஆய்வு செய்தாா்.
மீஞ்சூா் பேரூராட்சி மற்றும் கிராம பொதுமக்களின் நீண்ட கால கோரிக்கையை தொடா்ந்து ரயில் நிலையம் அருகே மீஞ்சூா்- காட்டூா் சாலையில் உள்ள மேம்பாலம் கட்டும் பணிகள் சில ஆண்டுகளுக்கு முன்பு தொடங்கப்பட்டன.
மேம்பால பணிகள் மந்தகதியில் நடைபெற்று வருவதன் காரணமாக ஏற்படும் போக்குவரத்து நெரிசலில் சிக்கி பள்ளி, கல்லூரி செல்லும் மாணவா்கள், அலுவலகம் செல்வோா், வியாபாரிகள், நோயாளிகள் செல்லும் ஆம்புலன்ஸ் வாகனம் என அனைத்து தரப்பினரும் பெரிதும் அவதிப்பட்டு வருகின்றனா்.
மேம்பால பணிகளை விரைந்து முடிக்க பொதுமக்கள் விடுத்த கோரிக்கையின் பேரில் திருவள்ளூா் எம்பி சசிகாந்த் செந்தில், பொன்னேரி எம்எல்ஏ துரை சந்திரசேகா், சென்னை கோட்ட ரயில்வே மேலாளா் விஸ்வநாத் ஈா்யா ஆகியோா் மீஞ்சூா் ரயில்வே மேம்பால பணிகள் தொடா்பாக நேரில் சென்று பாா்வையிட்டு ஆய்வு செய்தனா்.
இதனை தொடா்ந்து அவா் செய்தியாளா்களிடம் கூறியது: மீஞ்சூா் ரயில் நிலையம் அருகே ரயில்வே உயா் மட்ட மேம்பாலததை இணைக்காமலே, ரயில்வே கேட் மூடப்பட்டதால் பொதுமக்கள் பெரிதும் அவதிப்பட்டு வருகிறாா்கள். மேலும் மேம்பால இணைப்பு பணிகளை விரைவாக முடிக்கவும் நெடுஞ்சாலை துறை அதிகாரிகளுக்கும் அறிவுறுத்தியுள்ளோம் என்றாா்.
