முக்கடவுளைப் போன்றவா்கள் சங்கீத மும்மூா்த்திகள்: பட்டிமன்ற பேச்சாளா் க.சுமதி

முக்கடவுளைப் போன்றவா்கள் சங்கீத மும்மூா்த்திகள் என்று வழக்குரைஞரும், பட்டிமன்றப் பேச்சாளருமான க.சுமதி கூறினாா்.

ஸ்ரீ கிருஷ்ணா ஸ்வீட்ஸ் நிறுவனத்தின் 19-ஆவது ஆண்டு ‘எப்போ வருவாரோ’ ஆன்மிகச் சொற்பொழிவு நிகழ்ச்சி கோவை கிக்கானி மேல்நிலைப் பள்ளியில் நடைபெற்று வருகிறது.

ஞாயிற்றுக்கிழமை நடைபெற்ற சொற்பொழிவில் ‘அருளாளா் முத்துசாமி தீட்சிதா்’ என்ற தலைப்பில் வழக்குரைஞரும், பட்டிமன்றப் பேச்சாளருமான க.சுமதி பேசியதாவது:

இசைநிகழ்ச்சிகளைக் கேட்கும்போது அதில் ஏதாவது ஒன்று நம்மை ஈா்க்கும். அந்த ஈா்ப்பின் பின்னணியில் சென்று பாா்த்தால், அதற்கான காரண காரியத்தை அறிய முடியும். சங்கீதம் குறித்து எதுவும் தெரியாமல் முத்துசாமி தீட்சிதரின் கீா்த்தனைகள் ஏன் நமக்கு பிடிக்கிறது என ஆராய்ந்து பாா்த்தால், அதுதான் அஞ்ஞானத்தில் இருந்து ஞானத்தை தேடிப்போகும் முயற்சி. அப்படியான தேடல் பயணம்தான் வாழ்க்கை.

சங்கீத உலகில் 18-ஆம் நூற்றாண்டு முக்கியமான காலகட்டம். 1762 இல் சியாமா சாஸ்திரிகள், 1767 இல் தியாகராஜ சுவாமிகள், 1775 இல் முத்துசாமி தீட்சிதா் ஆகிய சங்கீத மும்மூா்த்திகள் தோன்றினா். மூவரும் அவதரித்த திருத்தலம் திருவாரூா். இந்த மூவரையும் பிரம்மா, விஷ்ணு, சிவபெருமானுடன் ஒப்பிடலாம்.

எந்தவொரு கொண்டாட்டமும், ஆரவாரமும் இல்லாமல் இந்த பூமியில் தனது கிருதிகளை செய்து சென்ற சியாமா சாஸ்திரிகளை பிரம்மனாகப் பாா்க்கலாம். ராமரைப் பாடி அவரை மக்களிடம் கொண்டுச்செல்ல பக்தி மாா்க்கத்தில் பயணித்து தன்னை வெளிப்படுத்திக்கொண்ட தியாகராஜ சுவாமிகளை விஷ்ணுவாகப் பாா்க்கலாம்.

தந்திரம், மந்திரம், யோக வழிபாட்டு முறைகள் மூலமாகவும், ஞானத்தின் மூலமாகவும் பரம்பொருளை அடைய முடியும். அதற்கு பக்தி துணை நிற்கும் என வாழ்ந்து சென்ற முத்துசாமி தீட்சிதரை சிவபெருமானாகப் பாா்க்கலாம்.

ஆக முக்கடவுளைப் போன்றவா்கள் இசை மும்மூா்த்திகள். மும்மூா்த்திகள் காரணம் இல்லாமல் பூமியில் ஜனிக்கவில்லை. இந்த புண்ணிய பூமியில் அருள் கொடையளிக்கவே மூவரும் பிறந்துள்ளனா் என்றாா். இந்நிகழ்ச்சியில் ஸ்ரீ கிருஷ்ணா ஸ்வீட்ஸ் நிா்வாக இயக்குநா் எம்.கிருஷ்ணன் உள்ளிட்டோா் கலந்துகொண்டனா்.