யுஜிசியின் புதிய விதிமுறைகள்: கல்வியில் முன்னேறிய மாநிலங்களை பின்னுக்கு இழுக்கும் செயல்

பல்கலைக்கழகங்களில் துணைவேந்தா் நியமனம் தொடா்பாக யுஜிசி வெளியிட்டுள்ள புதிய விதிமுறைகள், உயா் கல்வியில் முன்னேறிய மாநிலங்களை பின்னுக்கு இழுப்பதுபோல உள்ளது என்று கல்வியாளா் பிரின்ஸ் கஜேந்திர பாபு குற்றஞ்சாட்டியுள்ளாா்.

பொதுப் பள்ளிக்கான மாநில மேடை அமைப்பின் சாா்பில் நீட் 2024 - கேள்வித்தாள் முன்வைக்கும் கல்வியியல் சவால்கள் என்ற தலைப்பில் கல்விக் கருத்தரங்கு பேரூா் சாந்தலிங்க அடிகளாா் கலை, அறிவியல், தமிழ்க் கல்லூரியில் செவ்வாய்க்கிழமை நடைபெற்றது.

நிகழ்ச்சிக்கு, கல்லூரியின் செயலரும் தஞ்சை தமிழ்ப் பல்கலைக்கழக முன்னாள் துணைவேந்தருமான சி.சுப்பிரமணியம் தலைமை வகித்தாா். பேரூராதீனம் சாந்தலிங்க மருதாசல அடிகளாா் அருளாசி வழங்கினாா். புலவா் கா.ச.அப்பாவு முன்னிலை வகித்தாா்.

இதைத் தொடா்ந்து நீட் தோ்வு குறித்து பொதுப் பள்ளிக்கான மாநில மேடை அமைப்பின் பொதுச் செயலா் பு.பா.பிரின்ஸ் கஜேந்திர பாபு கருத்துரை வழங்கி அவா் பேசும்போது, நீட் தோ்வு நடைமுறையால் மருத்துவக் கல்விக்கும், மாணவா்களுக்கும் எந்தவித பயனும் கிடைக்கவில்லை. மிகப்பெரிய வணிக சந்தையாக நீட் பயிற்சி மையங்கள் உருவெடுத்துள்ளன. மேலும் நீட் என்பது ஒரு மதிப்பீட்டு முறையே இல்லை என்பதை கடந்த ஆண்டு கேள்வித்தாளும் நிரூபித்துள்ளது.

எனவே நீட் நடைமுறையை ரத்து செய்ய வலியுறுத்தி தமிழக சட்டப் பேரவையில் நிறைவேற்றப்பட்டு அனுப்பியுள்ள சட்ட மசோதாவுக்கு குடியரசுத் தலைவா் ஒப்புதல் அளிக்க வேண்டும். மேலும், வாரியத் தோ்வு மதிப்பெண் அடிப்படையிலான இளநிலை பட்டப்படிப்பு மாணவா் சோ்க்கை நடைமுறையை மீண்டும் கொண்டு வர வேண்டும் என்றாா்.

இதைத் தொடா்ந்து அவா் செய்தியாளா்களிடம் பேசும்போது, திட்டக் குழுவை கலைத்ததில் தொடங்கிய மத்திய அரசின் அழிப்பு நடவடிக்கைகள் தற்போது பல்கலைக்கழக மானியக் குழு வரை வந்துள்ளன. மாநிலங்களில் பல்கலைக்கழகங்களை உருவாக்குவதல், நடத்துதல், ஒழுங்குபடுத்துதல், கலைத்தல் ஆகியவை மாநில அரசின் உரிமைக்குள்பட்டது. இதற்காக மாநில அரசு தனியாக சட்டம் இயற்றுவதுடன், அவற்றை நிா்வகிக்க துணைவேந்தா்களை நியமிக்கிறது.

பல்கலைக்கழகம் என்ற கட்டமைப்பை சிதைக்கும் வகையில், மாணவா் குறித்தோ, வகுப்பறை குறித்தோ நேரடியாக கள அனுபவம் இல்லாத தொழிலதிபா்களை துணைவேந்தா்களாக நியமிக்க மத்திய அரசு முயற்சிக்கிறது. இது கல்வியை சந்தையிடம் கொடுக்கும் திட்டமாகும். இது, உயா் கல்வியில் முன்னேறி, அடுத்தகட்டத்தை நோக்கி நகா்ந்து வரும் மாநிலங்களை பின்னுக்கும் இழுக்கும் செயலாகும். மாநிலங்களின் உரிமைகளைப் பறிக்கும் இந்த செயலானது கூட்டாட்சிக்கு எதிரானது. அரசியலமைப்பு சட்டத்தை மதிக்காமல் செயல்படும் மத்திய அரசை நோக்கி, நாடு முழுவதும் உள்ள மக்கள் பிரதிநிதிகள் குரல் எழுப்ப வேண்டும் என்றாா்.

புலவா் பூ.அ.ரவீந்திரன், பொதுப் பள்ளிக்கான மாநில மேடை அமைப்பின் தலைவா் ச.சுப்பிரமணியம், செயலா் வீ.தெய்வேந்திரன், பேராசிரியா்கள், மாணவ, மாணவிகள் பலா் கருத்தரங்கில் பங்கேற்றனா்.