முல்லைப் பெரியாறு குடிநீா்த் திட்டம் மாா்ச் மாதம் பயன்பாடுக்கு வரும்: அமைச்சா் கே.என். நேரு

முல்லைப் பெரியாறு குடிநீா்த் திட்டம் மாா்ச் மாதம் பயன்பாட்டுக்கு வரும் என மாநில நகராட்சி நிா்வாகம், குடிநீா் வழங்கல் துறை அமைச்சா் கே.என். நேரு தெரிவித்தாா்.

மதுரை உத்தங்குடியில் ‘அம்ரூத் 2.0’ திட்டத்தின் கீழ் மதுரை கிழக்கு, திருப்பரங்குன்றம், மதுரை வடக்கு, மதுரை தெற்கு ஆகிய சட்டப்பேரவைத் தொகுதிக்குள்பட்ட பகுதிகளில் ரூ.471.89 கோடியில் புதை சாக்கடை திட்டப் பணிகளுக்கான அடிக்கல் நாட்டு விழா ஞாயிற்றுக்கிழமை நடைபெற்றது.

விழாவில், அமைச்சா் கே. என். நேரு கலந்து கொண்டு திட்டப் பணிகளை தொடங்கி வைத்துப் பேசியதாவது :

மதுரை மாநகராட்சியைப் பொருத்தவரை வைகை வடகரை பகுதியில் புதிதாக இணைக்கப்பட்ட வாா்டுகளில் விடுபட்ட பகுதிகளுக்கும், வைகை தென்கரைப் பகுதிகளில் இணைக்கப்பட்ட வாா்டு பகுதிகளுக்கும் புதை சாக்கடை கட்டமைப்பு ஏற்படுத்த ‘அம்ரூத் 2.0’ திட்டத்தின் கீழ் ரூ.471.89 கோடியில் பணிகள் நடைபெற உள்ளன.

மதுரை மாவட்டத்தில் வளா்ச்சிப் பணிகளை மேற்கொள்ள கடந்த 3 ஆண்டுகளில் ரூ. 5 ஆயிரம் கோடி நிதியை தமிழக முதல்வா் மு.க.ஸ்டாலின் வழங்கினாா்.

மதுரை மாநகராட்சி, மேலூா், உசிலம்பட்டி, திருமங்கலம் ஆகிய நகராட்சிகளுக்கு மட்டும் கடந்த 3 ஆண்டுகளில் ரூ. 1,800 கோடி வழங்கப்பட்டுள்ளது. இதுதவிர, புகா் பகுதிகளில் குடிநீா் திட்டப் பணிகளை செயல்படுத்துவதற்கு ரூ. 1,559 கோடி ஒதுக்கீடு செய்யப்பட்டது.

மதுரை மாநகராட்சியில் வசித்து வரும் மக்களின் தேவை அறிந்து கூடுதலாக குடிநீா் வசதிகளை ஏற்படுத்துவதற்கு ரூ. 1,695 கோடியில் முல்லைப் பெரியாறு கூட்டுக் குடிநீா் திட்டம் செயல்படுத்தப்படுகிறது. மதுரையில் வருகிற மாா்ச் மாதம் தமிழக முதல்வா் மு.க. ஸ்டாலின் முடிவுற்ற குடிநீா் திட்டப் பணிகளை தொடங்கி வைக்க உள்ளாா்.

இந்த நிலையில், மதுரை மாநகராட்சிப் பகுதிகளில் சேதமடைந்த சாலைகளை சீரமைப்பதற்கு ரூ. 130 கோடி ஒதுக்கப்பட்டது. மேலும், மாா்ச் மாதம் ரூ. 60 கோடி ஒதுக்க திட்டமிடப்பட்டுள்ளது. அந்தந்த பகுதி மக்களுக்கான அடிப்படை வசதிகளை மேம்படுத்த சட்டப்பேரவை உறுப்பினா்கள் கோரிக்கை விடுத்தனா். இந்தக் கோரிக்கையும் நிறைவேற்றித் தரப்படும். எதிா்கால தேவையை அறிந்து வளா்ச்சித் திட்டப் பணிகளை மேற்கொள்வதில் தமிழக அரசு, மக்களுக்கான அரசாக திகழ்கிறது என்றாா் அவா்.

நிகழ்வில், அமைச்சா்கள் பி. மூா்த்தி, பழனிவேல் தியாகராஜன், மாநில நகராட்சி நிா்வாக இயக்குநா் சிவராசு, மதுரை மாவட்ட ஆட்சியா் மா.சௌ.சங்கீதா, மாநகராட்சி மேயா் வ. இந்திராணி, ஆணையா் ச.தினேஷ்குமாா், சட்டப்பேரவை உறுப்பினா்கள் கோ.தளபதி

(மதுரை வடக்கு), பூமிநாதன் (மதுரை தெற்கு),துணை மேயா் தி. நாகராஜன், செய்தி மக்கள் தொடா்புத் துறை இணை இயக்குநா் வெற்றிச்செல்வன், மண்டலத் தலைவா்கள், அரசு அலுவலா்கள், பொதுமக்கள் கலந்து கொண்டனா்.

கலைந்து சென்ற தொண்டா்கள் : இந்த நிகழ்வு காலை 8. 30 மணிக்கு நடைபெறும் என அறிவிக்கப்பட்டிருந்தது. இதனால் மதுரை மாவட்டத்தின் பல்வேறு பகுதிகளிலிருந்து அரசுப் பேருந்துகள், தனியாா் வாகனங்களில் தொண்டா்கள் அழைத்து வரப்பட்டனா். காலை 8 மணி முதல் தொண்டா்கள் விழா அரங்கத்தில் அமைக்கப்பட்டிருந்த இருக்கைகளில் அமா்ந்தனா்.

அமைச்சா்கள் வருகையில் தாமதம் ஏற்பட்டதால், 8. 30 மணிக்குத் தொடங்க வேண்டிய நிகழ்வு முற்பகல் 11 மணிக்குத் தொடங்கியது. நிகழ்ச்சி நிரலின் படி அமைச்சா் கே. என். நேரு பேசுவதற்கு முற்பகல் 11.30 மணிக்கு மேல் ஆனது. காலையிலிருந்து இருக்கைகளில் அமா்ந்திருந்த தொண்டா்கள், அமைச்சா் கே.என். நேரு பேசுவதற்கு முன்பே எழுந்து செல்ல தொடங்கினா். பின்னா், சட்டப்பேரவை உறுப்பினா் கோ. தளபதி விடுத்த வேண்டுகோளின் படி தொண்டா்கள் மீண்டும் இருக்கைகளில் அமா்ந்தனா். அங்கு பாதுகாப்புப் பணியிலிருந்த போலீஸாா் கூட்டத்தை ஒழுங்குபடுத்தினா்.