விருதுநகா் மாவட்டத்தைச் சோ்ந்த பள்ளி மாணவா்களுக்கு ஜன. 21 ஆம் தேதியும், கல்லூரி மாணவா்களுக்கு ஜன. 22 ஆம் தேதியும் கவிதை, கட்டுரை, பேச்சுப் போட்டிகள் நடைபெற உள்ளது.
இதுகுறித்து மாவட்ட ஆட்சியா் வீ.ப.ஜெயசீலன் ஞாயிற்றுக்கிழமை வெளியிட்ட செய்திக் குறிப்பு:
தமிழ் வளா்ச்சித் துறை சாா்பில், பள்ளி, கல்லூரி மாணவா்களின் பேச்சாற்றல், படைப்பாற்றலை வளா்க்கும் வகையில், கவிதை, கட்டுரை, பேச்சுப் போட்டிகள் நடத்த திட்டமிடப்பட்டுள்ளன. பழைய மாவட்ட ஆட்சியரக கூட்டரங்கில் பள்ளி மாணவா்களுக்கு ஜன. 21-ஆம் தேதியும், கல்லூரி மாணவா்களுக்கு ஜன. 22-ஆம் தேதியும் இந்தப் போட்டிகள் நடைபெறுகின்றன.
இதில் அனைத்து அரசுப் பள்ளிகள், அரசு உதவி பெறும் பள்ளிகள், தனியாா் பள்ளிகளின் பிளஸ் 1, பிளஸ் 2 மாணவா்கள் மட்டுமே பங்கேற்க முடியும். இதேபோல, அனைத்து அரசு, தனியாா், உதவி பெறும் கல்லூரிகள், பொறியியில் கல்லூரிகள், மருத்துவக் கல்லூரி, பல்தொழில்நுட்பக் கல்லூரிகளில் பயிலும் மாணவா்கள் கலந்து கொள்ளலாம்.
போட்டிக்கு ஒருவா் வீதம் ஒரு பள்ளி, கல்லூரியிலிருந்து மொத்தம் 3 மாணவா்கள் பங்கேற்கலாம். பள்ளி மாணவா்கள், தங்களது விண்ணப்பங்களைத் தலைமையாசிரியா் ஒப்புதலுடனும், கல்லூரி மாணவா்கள் தங்களது விண்ணப்பங்களைத் கல்லூரி முதல்வரின் ஒப்புதலுடனும் விருதுநகா் மாவட்டத் தமிழ் வளா்ச்சி உதவி இயக்குநா் அலுவலகத்தில் நேரிலோ, அஞ்சல் மூலமாகவோ வருகிற 20-ஆம் தேதிக்குள் அனுப்பிவைக்க வேண்டும்.
இவற்றுக்கான தலைப்புகள் போட்டி தொடங்குவதற்கு சற்று முன்பாக தெரிவிக்கப்படும். போட்டிகளின் முடிவுகள் உடனடியாக அறிவிக்கப்பட்டு, வெற்றி பெற்ற மாணவா்களுக்கு விருதுநகா் மாவட்ட ஆட்சியா் பரிசுகள் வழங்கவுள்ளாா்.
வெற்றி பெற்றவா்களுக்கு முதல் பரிசு ரூ.10,000, இரண்டாம் பரிசு ரூ.7,000, மூன்றாம் பரிசு ரூ.5,000 வழங்கப்படும். மாவட்ட அளவிலான போட்டிகளில் முதல் பரிசு பெறும் மாணவா்கள், மாநில அளவிலான போட்டிகளில் கலந்து கொள்ளப் பரிந்துரைக்கப்படுவா் என்றாா்.
